قازاقستان ۋران ەكسپورتتاۋدىڭ رەسەيدەن تىس بالاما جولىن تاپتى

استانا. قازاقپارات - ەلىمىز ۋران ساتۋ جانە شەتەلگە جونەلتۋدە رەسەي اۋماعىنسىز جۇزەگە اسىرۋ جولىن قاراستىرىپ جاتىر.

بۇل تۋرالى «قازاتومونەركاسىپ» ا ق باسقارما ءتوراعاسى ەرجان مۇقانوۆ ءمالىم ەتتى، دەپ حابارلايدى قازاقپارات ءتىلشىسى.

«ءبىز رەسەيگە قارسى سانكسيا اسەرى بويىنشا تالداۋ جاساپ وتىرامىز. ۋكرايناداعى گەوساياسي جاعداي نارىقتاعى ۋران باعاسىنىڭ جانە ۇلتتىق ۆاليۋتانىڭ ايىرباس باعامىنىڭ ايتارلىقتاي قۇبىلۋىنا اكەلدى. دەگەنمەن بۇگىنگە دەيىن رەسەيگە سالىنعان سانكسيالار ۋران ساتۋ مەن تاسىمالداۋ قىزمەتىنە ايتارلىقتاي اسەر ەتكەن جوق. گەوساياسي جاعدايدى ەسكەرە وتىرىپ، لوگيستيكاعا باسا نازار اۋدارامىز. وسى ورايدا سانكت-پەتەربۋرگ پورتى ارقىلى وتەتىن ءبىزدىڭ نەگىزگى مارشرۋتىمىزدىڭ شتاتتىق رەجيمدە جۇمىس ىستەپ تۇرعانىن ەسكە سالامىز»، - دەدى ەرجان مۇقانوۆ كومپانيادا وتكەن باسپا ءسوز ءماسليحاتىندا.

كومپانيا باسشىسىنىڭ ايتۋىنشا، ءونىمدى جەتكىزۋدە ەشقانداي شەكتەۋلەر جوق.

«سوعان قاراماستان ءبىزدىڭ كومپانيا رەسەي فەدەراتسياسىنىڭ اۋماعىنان تىس وتەتىن جانە 2018-جىلدان بەرى تابىستى پايدالانىپ كەلە جاتقان بالاما ترانسكاسپي حالىقارالىق كولىك باعىتىنا كوشۋ بويىنشا شارا قابىلداندى. بۇل باتىس كونۆەرتەرلەرىندەگى وپەراتسيالاردى جۇزەگە اسىرۋعا، سونداي-اق باتىس كونۆەرسيالىق كاسىپورىندارى كليەنتتەرى الدىنداعى مىندەتتەرىمىزدى ورىنداۋعا مۇمكىندىك بەرەدى»، - دەيدى ول.

ۋران ەكسپورتتاۋ ترانسكاسپي حالىقارالىق كولىك باعىتى ارقىلى جۇزەگە اساتىنىن كومپانيانىڭ كوممەرتسيا جونىندەگى ديرەكتورى دا راستادى.

«ءبىز ۇلتتىق وپەراتور رەتىندە بۇل باعىتتا ەشقانداي پروبلەما جوق ەكەنىن راستاي الامىز. اتالعان باعىت ارقىلى بۇكىل جوسپارلانعان جونەلتىلىم بيىل كۇزدە 100 پايىز ورىندالۋى كەرەك»، - دەپ تولىقتىردى داستان كوشەربايەۆ بريفينگ بارىسىندا.