پاريج بەن نيۋ-يورك تە سۋ استىندا قالعان - «استانا باس جوسپارى» ەلوردا كوشەلەرىن باسقان سۋ جايلى

استانا. قازاقپارات - «استانا باس جوسپارى» ج ش س ديرەكتورىنىڭ ورىنباسارى ەركەبۇلان فايزۋللايەۆ ەلوردادا جاڭبىر سۋىنىڭ نەلىكتەن كارىز جۇيەلەرىنە كەتپەي، كوشەگە جايىلىپ كەتەتىنىنە قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

«2035 -جىلعا دەيىنگى باس جوسپاردا قالانى جاڭىر سۋىنا ارنالعان كارىز جۇيەسىمەن تولىق قامتۋ كوزدەلگەن. ول ءۇشىن 2025 -جىلعا دەيىن كارىز سۋىن تازالايتىن 7 نىسان سالۋ كەرەك. 2035 -جىلعا دەيىن تاعى 7 نىسان سالۋ ورىندى. قازىر كارىز جۇيەلەرى ارقىلى جاڭبىر سۋىنىڭ تەك 70 پايىز عانا اعادى. سوندىقتان الداعى ەكى جىلدا كارىز سۋىن تازارتۋ نىساندارىن سالۋ كەرەك. بۇل تاياۋ ارادا بولۋى مۇمكىن ماسەلەلەردى تولىق شەشەدى. ال بولاشاقتا قالانىڭ ءارى قاراي داميتىنىن ەسكەرسەك، وندا 2035 -جىلعا دەيىن تاعى 7 تازارتۋ نىسانىن سالۋ قاجەت بولادى»، - دەدى ەركەبۇلان فايزۋللايەۆ.

ونىڭ سوزىنشە، قازىرگى كارىز جۇيەلەرى قازىرگى زامانعى نورماتيۆتىك تالاپتارعا جاۋاپ بەرمەيدى.

«قازىر قولدانىستاعى جاڭىر سۋىنا ارنالعان كارىز جۇيەلەرى كەڭەستىك نورماتيۆتەرمەن سالىنعان، تيسىنشە ەسكى. كەشە ايلىق نورمادان ارتىق جاۋىن ءتۇستى. ءبىر ساتتە كوپ كولەمدە سۋ تۇسكەن سوڭ كارىز جۇيەسىنىڭ وعان قاۋقارى جەتپەي قالدى. بۇل الەمدىك دەڭگەيدەگى كليماتتىق وزگەرىس سالدارىنان بولىپ وتىر. ءتىپتى پاريج بەن نيۋ-يورك تە سۋ استىندا قالعان»، - دەپ ءمالىم ەتتى ەركەبۇلان فايزۋللايەۆ.

ەسكە سالايىق، وسى ايدىڭ باسىندا استانانى سۋ باستى. ارتىنشا كارىز جۇيەلەرىنە جاۋاپتى بولعان «Elorda eco system» كومپانياسىنىڭ ديرەكتورى قىزمەتىنەن كەتكەن بولاتىن.