قىتاي جاپونيادان تەڭىز ونىمدەرىن يمپورتتاۋدى توقتاتتى

بەيجىڭ. قازاقپارات - 24-تامىزدان باستاپ قىتاي «فۋكۋسيما-1» ا ە س سۋىنىڭ مۇحيتقا اعىزىلا باستاۋىنا بايلانىستى جاپونيادان تەڭىز ونىمدەرىن يمپورتتاۋدى توقتاتتى.

بۇل تۋرالى بەيسەنبى كۇنى قىتاي حالىق رەسپۋبليكاسىنىڭ باس كەدەن باسقارماسى مالىمدەدى، دەپ حابارلايدى قازاقپارات.

اگەنتتىك مالىمدەمەسىندە قىتايلىق تۇتىنۋشىلاردىڭ دەنساۋلىعىن ساقتاۋ جانە يمپورتتالاتىن ازىق-تۇلىك قاۋىپسىزدىگىن قامتاماسىز ەتۋ ءۇشىن باس كەدەن باسقارماسى 24-تامىزدان باستاپ جاپونيادان شىققان تەڭىز ونىمدەرىنىڭ يمپورتىن توقتاتاتىنى ايتىلعان.

جاپونيا 24-تامىزدان باستاپ «فۋكۋسيما-1» اتوم ەلەكتر ستانتسياسىنان سۋ اعىزا باستادى.

2011 -جىلى 11-ناۋرىزدا تەڭىزدە بولعان ماگنيتۋداسى 9,0 بولاتىن جويقىن جەر سىلكىنىسى ناتيجەسىندە جاپونيانىڭ شىعىس جاعالاۋىندا قۋاتتى سۋنامي بولعان ەدى. جەر سىلكىنىسى مەن سۋنامي 20 مىڭعا جۋىق ادامنىڭ ءومىرىن قيدى. تابيعي اپات فۋكۋسيما اتوم ەلەكتر ستانسياسىنداعى اپاتقا دا سەبەپ بولدى.