اتا- انالاردى پەداگوگيكالىق قولداۋ ورتالىعى جۇمىسىن باستايدى
«ءبىز تاربيە جۇمىسىنىڭ ءرولىن كۇشەيتۋگە كوپ كوڭىل بولەمىز. سوندىقتان، بۇل جۇمىستا ءبىز ءۇشىن اتا- انالاردىڭ قولداۋى وتە ماڭىزدى. وسىعان بايلانىستى بيىل 1- قىركۇيەكتەن باستاپ بارلىق ءبىلىم بەرۋ ۇيىمدارىندا اتا- انالاردى پەداگوگيكالىق قولداۋ ورتالىعى جۇمىسىن باستايدى. ولاردىڭ باستى باسىمدىقتارى - بالالاردى وقىتۋ مەن تاربيەلەۋدە وتباسى مەن مەكتەپتىڭ ءوزارا ءىس- قيمىلى بويىنشا جۇمىستى كۇشەيتۋ جانە اتا- انالاردىڭ پوزيتيۆتى مادەنيەتىن دامىتۋ. ۇلتتىق قۇرىلتاي وتىرىسىندا مەملەكەت باسشىسى ءبىلىم سالاسىنا قاتىستى ءبىرقاتار نەگىزگى مىندەتتەرگە توقتالدى. اتاپ ايتقاندا، پاتريوتيزمدى، ءبىلىمپازدىقتى، ناعىز مامان بولۋدى، ۇنەمشىلدىكتى، ەڭبەكقورلىقتى قالىپتاستىرۋ»، - دەدى مينيستر ءبىلىم سالاسى قىزمەتكەرلەرىنىڭ رەسپۋبليكالىق تامىز كەڭەسىندە.
ونىڭ اتاپ وتۋىنشە، «ۇلتتىق تاربيە - ەل بولاشاعى» تاربيەسىنىڭ تۇجىرىمدامالىق نەگىزدەرى ەنگىزىلۋدە. 1 - قىركۇيەكتەن باستاپ 2023-2025 -جىلدارعا ارنالعان ءبىرتۇتاس تاربيە باعدارلاماسىن ىسكە اسىرۋ باستالادى.
ول جالپى ادامزاتتىق جانە ۇلتتىق قۇندىلىقتار نەگىزىندە وسكەلەڭ ۇرپاقتى تاربيەلەۋ ساپاسىن ارتتىرۋعا باعىتتالعان جانە 5 ميلليون ءبىلىم الۋشىنى، سونداي- اق اتا- انالار مەن جۇرتشىلىقتى قامتيدى.
بيىل العاش رەت ءبىلىم الۋشىلارمەن تاربيە باعدارلاماسىندا وقىتۋ ءۇشىن ىشكى ىستەر، توتەنشە جاعدايلار، قورعانىس مينيسترلىكتەرى مەن ۇلتتىق قاۋىپسىزدىك كوميتەتى وكىلدەرى تارتىلادى.
«ءبىز وقۋ ساۋاتىنىڭ ءرولىن كۇشەيتۋگە، «وقۋعا قۇشتار مەكتەپ» جوباسى اياسىندا كىتاپ ارقىلى تاربيەلەۋگە كوپ كوڭىل بولەمىز. قازىر ءبىلىم بەرۋ ۇيىمدارىندا كوركەم ادەبيەت قورى 3,7 ميلليون داناعا ۇلعايدى جانە جۇيەلى تۇردە دامي بەرمەك. سونداي- اق، مەملەكەت باسشىسىنىڭ تاپسىرماسى بويىنشا «بالالار كىتاپحاناسى» جوباسى ىسكە اسىپ جاتىر. ونىڭ شەڭبەرىندە مەكتەپ كىتاپحانالارىنىڭ قورىن وتاندىق جانە الەمدىك ادەبيەتتىڭ ۇزدىك ۇلگىلەرىمەن تولىقتىرۋ جوسپارلانۋدا. بۇل جوبا ۇلتتىق قۇندىلىقتار نەگىزىندە بالالاردى تاربيەلەۋگە جانە جالپى كىتاپقا دەگەن قىزىعۋشىلىقتى وياتۋعا باعىتتالعان»، - دەدى عاني بەيسەمبايەۆ.
ول بۇقارالىق سپورتتى دامىتۋ جانە سالاۋاتتى ءومىر سالتى قاعيداتتارىن قالىپتاستىرۋ ءۇشىن مينيسترلىك سپورتتىڭ 10 ءتۇرى بويىنشا مەكتەپ جانە ستۋدەنتتەر ليگالارىن، سونداي- اق قىسقى، جازعى گيمنازيادانى، رەسپۋبليكالىق كوپ دەڭگەيلى جارىستار مەن تۋرنيرلەر وتكىزەتىنىن ايتتى.
«توعىزقۇمالاق، اسىق اتۋ ۇلتتىق سپورت تۇرلەرىن دامىتۋدامىز. تەك بيىل عانا ۇلتتىق مەكتەپ ليگاسى اياسىندا 2 ميلليوننان استام وقۋشىنىڭ قاتىسۋىمەن 39 جارىس وتكىزىلدى، 800 گە جۋىق وقۋشى Ⅺقىسقى گيمنازياداعا قاتىستى»، - دەدى ول.