بۇكىل ستۋدەنتتەر جاساندى ينتەللەكت بويىنشا كۋرس وقۋعا مىندەتتەلەدى
بۇل تۋرالى ق ر عىلىم جانە جوعارى ءبىلىم ءمينيسترى ساياسات نۇربەك ەلوردادا جوعارى ءبىلىم جانە عىلىم فورۋمىندا ايتتى، دەپ حابارلايدى قازاقپارات ءتىلشىسى.
«كەلەشەكتە جاساندىق ينتەلەكتىنى مەڭگەرگەن ماماندار سۇرانىسقا يە بولادى، ال يگەرمەگەندەر - جۇمىس ورىندارىنان ايىرىلادى. سوندىقتان، ەستەرىڭىزدە بولسا ءبىرىنشى ستراتەگيانى سيفرلىق ساۋاتتىلىق ۇعىمىنان باستاعان ەدىك. بارلىق جەردە سيفرلىق ساۋاتتىلىق بولۋى كەرەگىن ايتتىق. وزدەرىڭىز كورگەندەي، ءبىر جىلدا الەمدە ۇلكەن وزگەرىستەر بولدى، ءبىز ەندى سيفرلىق ەمەس، جاساندى ينتەللەكت سالاسىندا ساۋاتتى بولۋ كەرەگىن ايتىپ جاتىرمىز. ءبىز قازىر Google كومپانياسىمەن بىرلەسىپ، جاساندى ينتەللەكت ساۋاتتىلىعى جونىندەگى كۋرستى پىسىقتاپ جاتىرمىز»، - دەدى ساياسات نۇربەك.
ءمينيستردىڭ ايتۋىنشا، كەلەسى ايدىڭ سوڭىندا نيۋ-يوركتە كەلىسىمشارت جاسالۋى مۇمكىن جانە كەلەسى وقۋ جىلىنان باستاپ بارلىق ستۋدەنتتەر مىندەتتى تۇردە جاساندى ينتەللەكت جونىندەگى كۋرستى وقيدى.
«ءبىزدىڭ ۇستانىمىمىز - ونى مىندەتتى ەتۋ، ويتكەنى بارلىق ستۋدەنت وقۋىن اياقتاعاندا جاساندى ينتەللەكت سالاسىندا نەگىزگى قۇزىرەتكە يە بولادى. بۇل يننوۆاتسيالىق كۋرس بولادى، ويتكەنى الەمدە جوق»، - دەيدى عىلىم ءمينيسترى.
ايتا كەتەيىك، استانادا تۇڭعىش رەت جوعارى ءبىلىم جانە عىلىم فورۋمى ءوتىپ جاتىر.
فورۋمنىڭ تاقىرىبى ەلدىڭ ەكونوميكالىق ءوسۋىنىڭ نەگىزى رەتىندە ادامي كاپيتالدى دامىتۋعا ارنالعان.