اۋليەكولدەگى الاپات ءورت: ورمان شارۋاشىلىعىنىڭ ەكس-ديرەكتورى سوت زالىنان بوساتىلدى

استانا. قازاقپارات - قوستاناي وبلىسىنىڭ اۋليەكول اۋدانىندا بولعان ءىرى ورتكە قاتىسى بار دەپ ايىپتالعان «باسامان» ورمان شارۋاشىلىعىنىڭ ديرەكتورى سوت زالىنان بوساتىلدى، دەپ حابارلايدى قازاقپارات «قوستاناي جاڭالىقتارى» باسىلىمىنا سىلتەمە جاساپ.

ايىپتاۋ اكتىسىنە سايكەس، 2020 -جىل - 2022 -جىلدىڭ قىركۇيەگى ارالىعىندا ورمان شارۋاشىلىعىنىڭ بۇرىنعى ديرەكتورى اسحات جاقاشەۆ لاۋازىمىن پايدالانىپ، جەكەمەنشىك يەلەرىنە ءورت تۇتانۋ قاۋپى جوعارى كەزەڭدە اعاشتاردى رۇقسات قۇجاتتارسىز كەسۋگە مۇمكىندىك بەرگەن. سول ءۇشىن 15 ميلليون تەڭگە كولەمىندە سىياقى العان دەپ ايىپتالدى.

پروكۋرور اسحات جاقاشەۆتى 7 جىلعا باس بوستاندىعىنان ايىرىپ، زارداپ شەككەندەردىڭ ازاماتتىق ارىزى بويىنشا 21 ميلليارد تەڭگە كولەمىندە وتەماقى تالاپ ەتتى.

ءىستى قاراۋ كەزىندە سوت قىلمىستىق ءىس بابىن اۋىستىردى: جاقاشەۆ ءىسى سوتقا ق ر قىلمىستىق كودەكسىنىڭ 361-بابى 4-بولىگى 3-تارماعى («اۋىر زارداپتارعا اكەپ سوققان لاۋازىمدىق وكىلەتتىكتەردى تەرىس پايدالانۋ») بويىنشا بەرىلگەن بولاتىن. بۇل قىلمىستىڭ قۇرامىن سوت دالەلسىز دەپ تاپتى. ناتيجەسىندە ا. جاقاشەۆتى «سالعىرتتىق» بابى بويىنشا كىنالى دەپ تانىدى.

سوت اسحات جاقاشەۆتىڭ بوستاندىعىن 3 جىلعا شەكتەپ، ءۇش جىل بەلگىلى ءبىر قىزمەتتەردى اتقارۋ قۇقىعىنان ايىردى. زارداپ شەككەندەردىڭ ازاماتتىق ارىزى بويىنشا تالاپتارىن سوت قاناعاتتاندىرمادى.

ءىستى سوتتىڭ قاراۋى كەزىندە جاقاشەۆ قاماۋدا بولدى. ۇكىمدى وقۋ كەزىندە سوت زالىندا وتىرعان ونىڭ تۋىستارى مەن جاقىندارى قۋانىشتان كوز جاسىن تيا المادى. كەيىن زالدا دۋ قول شاپالاق سوقتى.