قىمبات سمارتفوندار ارزاندايدى
دەگەنمەن كومپانيا الەمدىك نارىقتا وسكەن، Apple ۇلگىسىندەگى ساتىلىم دۇكەندەرىنىڭ جەلىسىن كەڭەيتىپ، ءۇندىستان مەن ەۋروپادا ساتىلىم كولەمىن ارتتىرعان.
پرەميۋم سمارتفوندار ساپالى قۇراستىرىلادى، مودەلدەر تەز ەسكىرمەيدى جانە ۇزاق قىزمەت ەتەدى. بۇل تۇتىنۋشىعا ءتيىمدى بولعانىمەن، وندىرۋشىلەر جاڭا مودەلدەردى ءجيى شىعارىپ، نارىقتا وزدەرىنىڭ ەرەجەسىن قالىپتاستىرىپ، باقىلاۋىندا ۇستاعىسى كەلەدى. جاقىندا Financial Times باسىلىمىندا قىمبات سمارتفوندار نارىعىندا سۇرانىستىڭ قىسقارعانى تۋرالى ماتەريال جاريالاندى. Aikyn.kz مۇنداي وزگەرىستەردىڭ سەبەبىن تۇسىندىرەدى.
2019 -جىلعا دەيىن ۇيالى بايلانىس كومپانيالارىمەن جاسالعان كەلىسىمشارتتار تۇتىنۋشىلاردى ەكى جىل سايىن سمارتفوندارىن اۋىستىرۋعا ىنتالاندىردى. سودان بەرى جاڭارتۋ سيكلدەرى بىرتىندەپ ۇزارىپ كەلەدى. قىتايلىق تۇتىنۋشىلار سمارتفوندارىن شامامەن 40 اي بويى پايدالانادى. بۇعان Apple سمارتفوندارىنىڭ بەدەلى مەن تانىمالدىلىعىن قوسساڭىز، جەرگىلىكتى وندىرۋشىلەر ءۇشىن قيىندىقتار كوبەيگەنىن بايقايمىز.
Counterpoint Research كومپانياسىنىڭ باعالاۋىنشا، سمارتفونداردىڭ جاھاندىق ءوندىرىسى بيىلعى جىلى 6 پايىزعا ازايىپ، 1,15 ميلليارد سمارتفوندى قۇرادى. بۇل سوڭعى ونجىلدىقتاعى ەڭ ءالسىز كورسەتكىش. ونىڭ باستى سەبەبى - قىتاي ەكونوميكاسىنىڭ توقىراۋى. ەكىنشى توقساندا دا سمارتفوندار ساتىلىمى سوڭعى 10 جىلداعى ەڭ تومەنگى دەڭگەيگە جەتكەن.
Apple - بۇل ترەندكە قارسى جۇزەتىن بىرنەشە برەندتىڭ كوشىن باستايدى. المالى برەندىنىڭ ەكىنشى توقساندا ساتۋ كولەمى 7 پايىزعا ءوسىپ، نارىقتاعى ۇلەسى 17 پايىزدان استى. امەريكالىق تەحنولوگيالىق الپاۋىتى قىتايلىق نارىقتا جەرگىلىكتى ءوندىرۋشى Vivo-مەن ءبىرىنشى ورىندى ءبولىسىپ كەلەدى.
ءاربىر iPhone-نىڭ جاڭا شىعارىلىمىن تاعاتسىزدانا كۇتەتىن قىتاي جاستارى وزدەرىنىڭ الەۋمەتتىك مارتەبەسىن وسى سمارتفوننىڭ جاڭا مودەلىمەن بايلانىستىراتىنعا ۇقسايدى.
بۇل قىتايلىق كومپانيالاردى جەرگىلىكتى برەندتەردى ۇناتاتىن ساتىپ الۋشىلار ءۇشىن باسەكەلەسۋگە ءماجبۇر ەتەدى. ۇزدىكتەر قاتارىندا بەس كومپانيا تۇر: Vivo, Oppo, Realme, Honor جانە Xiaomi. سوڭعى ەكەۋىنىڭ ساتىلىمى بيىل تومەندەگەن.
Xiaomi-نىڭ قىتايلىق نارىقتاعى پوزيتسياسىنىڭ ناشارلاۋى كۇتپەگەن جاعداي بولدى. ويتكەنى كومپانيا الەمدىك ەلەكترونيكا نارىعىندا جاقسى ءوسىم كورسەتۋدە. كومپانيا قىتايدا Apple ۇلگىسىندەگى ساتىلىم دۇكەندەرىنىڭ جەلىسىن جاسادى، ءۇندىستان مەن ەۋروپادا ساتىلىم كولەمىن ءوسىردى. بۇنداي ماركەتينگتىك ستراتەگيا ءوز جەمىسىن بەرۋدە.
دەگەنمەن Xiaomi پرەميۋم سمارتفوندار شىعارۋدا الەمدىك ترەندكە ىلەسە المادى. مىسالى، ءۇندىستاندا Xiaomi تەلەفونى 2022 -جىلدىڭ سوڭعى توقسانىندا ءوزىنىڭ ءبىرىنشى ورنىن Samsung-كە بەرۋگە ءماجبۇر بولعان. وڭتۇستىككورەيالىق توپ ءوز ەلىندە جەڭىل قارجىلاندىرۋ كوزدەرىن تاۋىپ، جوعارى دەڭگەيلى مودەلدەردى كوپتەپ شىعارا باستادى. Xiaomi كومپانياسىنىڭ وسى توقسانداعى ساتىلىمىنىڭ رەكوردتىق تومەندەۋى دە قىتايلىق ءوندىرۋشىنىڭ پروبلەمالارىنىڭ كۇشەيگەنىن كورسەتەدى.
ونىڭ اكتسيالارى وتكەن جىلدىڭ باسىنان بەرى 37 پايىزعا تومەندەگەن، بۇل وپەراتسيالىق تابىستىڭ كولەمىن ەداۋىر ازايتتى. بۇل كورسەتكىش سوڭعى ەكى جىلدا ەكى ەسەدەن استامعا ازايىپ، شامامەن 2 پايىزدى قۇرادى.
پرەميۋم سمارتفونداردىڭ ساپالى قۇراستىرىلۋى ولاردىڭ ۇزاق قىزمەت ەتەتىنىن جانە از اۋىستىرۋدى قاجەت ەتەتىنىن بىلدىرەدى. جويقىن باسەكەنىڭ، تەحنولوگيالىق تىزبەكتەردىڭ وزگەرۋىنەن نارىقتىڭ بۇل سەگمەنتىندە باعا تومەندەۋى مۇمكىن. قارجىلىق ساراپشىلار قىتاي وندىرۋشىلەرىنىڭ اكتسيالارىنىڭ باعاسى دا قۇلدىرايتىنىن بولجاۋدا.