استانادا «شابىت» شىعارماشىلىق ورتالىعى بۇزىلىپ جاتىر: ۆيدەوعا تۇسىنىك بەرىلدى

استانا. قازاقپارات - «استانادا قازاق ۇلتتىق ونەر ۋنيۆەرسيتەتىنىڭ عيماراتى بۇزىلىپ جاتىر»، ج و و باسشىلىعى الەۋمەتتىك جەلىدە تاراعان ۆيدەوعا قاتىستى تۇسىنىك بەردى، دەپ حابارلايدى قازاقپارات.

««شابىت» شىعارماشىلىق ءۇيىنىڭ اپاتتى جاعدايىنا بايلانىستى جانە عيماراتتىڭ جاي-كۇيى جونىندەگى مەملەكەتتىك ورگانداردىڭ جۇمىس كوميسسياسى جۇرگىزگەن زەرتتەۋ نەگىزىندە، كوميسسيا كۇردەلى جوندەۋ جۇرگىزۋ قاجەتتىگى تۋرالى شەشىم قابىلدادى. وسىعان بايلانىستى قازىر عيماراتتا قايتا جوندەۋ جۇمىستارى ءجۇرىپ جاتىر»، - دەلىنگەن ج و و تاراتقان مالىمەتتە.

ايتا كەتەيىك، وقۋ ورنىنىڭ سايتىندا ۋنيۆەرسيتەت باسقا عيماراتقا كوشىرىلىپ جاتقانى تۋرالى جازىلعان.

ەسكە سالايىق، ستۋدەنتتەر «شابىت» ورتالىعىنىڭ شاتىرىنان ۇنەمى سۋ اعاتىنىن ايتىپ، بيلىك نازارىن وسى پروبلەماعا اۋدارۋ ءۇشىن ءتۇرلى ءىس-شارالار وتكىزگەن بولاتىن. «جاڭا ادامدار» جاستار قوزعالىسىنىڭ قاتىسۋىمەن ج و و عيماراتى الدىندا «شەلەك شابىتتى قۇرتادى» اتتى فلەشموب تا وتكەن ەدى.