ءماسليحات دەپۋتاتى ۆلاديسلاۆ سەرگەيەۆ قوعامدىق كولىكپەن ءجيى جۇرەتىنىن جانە جولاۋشىلاردىڭ ءبىرازى جول اقىسىن تولەمەيتىنىن بايقاعانىن ايتتى.
ءوز كەزەگىندە استانا قالاسى كولىك جانە جول-كولىك ينفراقۇرىلىمىن دامىتۋ باسقارماسى باسشىسى ورىنباسارىنىڭ مىندەتىن اتقارۋشى باۋىرجان تايبەرگەنوۆ بۇل ماسەلە اۆتوبۋستاردا اقى تولەۋ جۇيەسىن اۋىستىرۋ كەزىندە شەشىمىن تاباتىنىن ايتتى.
«جول اقىسىن تولەمەيتىندەر ماسەلەسىنە توقتالساق، بۇعان QR- كود ارقىلى ەسەپتەسۋ جۇيەسى اسەر ەتىپ وتىر. جولاۋشىلاردىڭ كەيبىرى كونترولەر جاقىنداعان كەزدە عانا جول اقىسىن تولەۋگە كىرىسەدى. جاڭا جۇيە بانك كارتاسى سياقتى بولادى، ياعني QR- كود جۇيەسىنەن باس تارتامىز. ازاماتتار تەك بانك كارتاسىن پايدالانىپ، اقىنى تەك اۆتوبۋستىڭ كىرەبەرىسىندە تولەيدى. ەگەر QR- تولەمىنەن باس تارتساق، بانكتىك جۇيە ىسكە قوسىلسا، وندا جول اقىسىن تولەمەيتىندەر شامامەن ەكى ەسە نەمەسە ءۇش ەسەگە دەيىن ازايۋى مۇمكىن»، - دەدى ب. تايبەرگەنوۆ.