جانۇشىرىپ سەكىرە بەرگەن. كۋاگەرلەر سىرداريا وزەنىندەگى قايعىلى وقيعا تۋرالى ايتتى
اۋىل تۇرعىندارىنىڭ سوزىنشە، جاعادا دەمالىپ وتىرعاندا ءبىر بالا سۋعا تۇنشىعا باستاعان. ونى ۇلكەندەر كورىپ، قۇتقارماق بولعاندا قالعان بالالار دا بىرىنەن كەيىن ءبىرى سۋعا سەكىرە بەرىپتى.
«ءبىرىنشى سول ءۇيدىڭ ءبىر بالاسى ءتۇستى دەدى. كىشكەنتاي ەمەس ەندى. 10 دى بىتىرگەن بولۋى كەرەك. سودان سونى قۇتقارامىن دەپ، اناسى كەتكەن. اناسىنىڭ ارتىنان قىزدارى سەكىرە بەرگەن دەدى عوي جانۇشىرىپ. قۇتقارامىن دەپ كەتكەن شىعار ەندى. باسقا نە بولادى ەندى؟ ءبىر ۇيدەن اناسىمەن قوسقاندا بەسەۋى كەتتى، ءبىر ۇيدەن ۇشەۋى كەتتى. ءبارى ءبىر اتانىڭ بالالارى عوي. ءبىر اتادان ءتورت بالا بولسا، سول ءتورت بالانىڭ ۇل-قىزدارى عوي. نەمەرە»، - دەيدى كوكساراي اۋىلىنىڭ تۇرعىنى مۇسابەك سارىمبەت.
سۋعا باتقانداردىڭ ايعايلاعان داۋىسىن ەستىپ، جاقىن ماڭدا بالىق اۋلاپ وتىرعان تۇرعىندار كومەككە جەتكەن. ايتپەگەندە 20 ادام دا سۋعا كەتىپ قالۋى مۇمكىن ەكەن.
«وسى جاعادا سۋ تەرەڭ عوي، وسى جاعادان شىعاردىق، 1-1,5 مەتردەي كەلەتىن سۋ. ءارى قاراي تەرەڭ عوي. ءوزىمىز بىردەڭە عىپ شىقتىق قوي، ءبىر-بىرىمىزگە كومەكتەسىپ، قولىمىزدان تارتىپ»، - دەيدى وتىرار اۋدانىنىڭ تۇرعىنى ءادىلحان امانوۆ.
قازىر وزەن جاعاسىندا سۋعا كەتكەن تاعى ەكى بالا ىزدەستىرىلىپ جاتىر. ولاردىڭ بىرەۋى 10 دا، ەندى بىرەۋى 12 دە.
ەسكە سالايىق، بۇعان دەيىن تۇركىستان وبلىسىندا 11 ادام سۋعا باتىپ كەتكەنىن، قۇتقارۋشىلار توعىز ادامنىڭ ءمايىتىن تاپقانىن حابارلانعان ەدىك.
ولاردىڭ ەكەۋى - ايەل، توعىزى - بالا. بالاردىڭ ەڭ كىشىسى ءتورت جاستا ەكەن. سۋعا باتقان تاعى ەكى ادام ىزدەستىرىلىپ جاتىر. ولاردىڭ جاسى 10 دا جانە 12 دە.
كەيىنىرەك الەۋمەتتىك جەلىدە ولاردىڭ سۋعا شومىلۋعا بارماعانى، كوپىر سىنىپ، ادامدار سودان كەيىن سۋعا باتقانى تۋرالى اقپارات تارادى.
الايدا مۇنى تۇركىستان وبلىسى توتەنشە جاعدايلار دەپارتامەنتى باسشىسىنىڭ ورىنباسارى باقىتجان زاپاروۆ راستامادى.
ال كەشە قارا جامىلعان اۋلەت توعىز تۋىسىن جەر قوينىنا تاپسىردى.