تۇركىستان وبلىسىنىڭ اكىمى قايعىلى جاعدايعا ۇشىراعان اۋلەتكە باردى

تۇركىستان. قازاقپارات - تۇركىستان وبلىسىنىڭ اكىمى دارحان ساتىبالدى وتىرار اۋدانىندا قايعىلى جاعدايعا ۇشىراعان اۋلەتكە ارنايى باردى، دەپ حابارلايدى قازاقپارات.

وبلىس اكىمدىگى باسپا ءسوز قىزمەتىنەن ءمالىم ەتكەندەي، اكىم سىرداريا وزەنىندە بولعان وقىس وقيعا سالدارىنان قايعى جامىلعان اۋلەتتىڭ اتا-اناسىنا، ەت جاقىندارىنا كوڭىل ايتتى. قايعىلارىنا ورتاقتاسىپ، قۇرانعا قاتىستى. ءتيىستى كومەك كورسەتىپ، قاجەتتىلىگىنشە قولداۋ ۇيىمداستىرۋ جۇرگىزىلەتىندىگىن جەتكىزدى.

وتىرار اۋدانىندا ءبىر اۋلەتتەن شىققان 4 وتباسىنىڭ مۇشەسى دارياعا دەمالۋعا كەلىپ، سوڭى قايعىلى جاعدايمەن اياقتالدى. بۇگىندە سۋعان باتقان 11 ادامنىڭ 9 ى تابىلىپ، جانازاسى شىعارىلىپ، جەر قوينىنا تاپسىرىلدى. وقىس وقيعاعا وراي توتەنشە جاعدايلار دەپارتامەنتى جانىنان جەدەل شتاب قۇرىلىپ، قۇتقارۋشىلار، اۋدان اكىمدىگى مەن ورمان شارۋاشىلىعى جانە ەرىكتىلەر جولدانىپ، بىردەن ىزدەستىرۋ شارالارىنا كىرىستى. ماسەلە وبلىس باسشىسى دارحان امانگەلدى ۇلىنىڭ تىكەلەي باقىلاۋىنا الىنىپ، ءتيىستى ۇيلەستىرۋ جۇمىستارىن جۇرگىزدى.

اتالعان جەردە بولىپ، ءتيىستى كومەكتەر ۇيىمداستىرىلدى. ىزدەستىرۋ شارالارىنا جالپى 150 بريگادا، 16 تەحنيكا، 6 ءجۇزۋ قۇرالى جۇمىلدىرىلدى.

قۇتقارۋشىلار مەن ەرىكتىلەر تۇرعىندارعا جاز بويى بۇل جەرگە سۋعا تۇسۋگە بولمايتىنى جايلى جان-جاقتى ەسكەرتۋ جۇرگىزگەن. انىقتالعانداي، مۇنداي ءتۇسىندىرۋ جۇمىستارىنا ءدال وسى اۋلەت تە قاتىسقان. الايدا رۇقسات ەتىلمەگەن ورىندا شومىلۋدىڭ زاردابى مەن ساقتىق شارالارىن ەسكەرمەۋدىڭ سالدارى وسىنداي جاعدايعا ۇلاسىپ وتىر.