مينيستر وقۋ جىلىنا دايىن ەمەس وڭىرلەرگە ەسكەرتۋ جاسادى

استانا. قازاقپارات - وقۋ-اعارتۋ ءمينيسترى عاني بەيسەمبايەۆ بىرنەشە ءوڭىردىڭ وقۋ جىلىنا دايىندىق بارىسىن سىنعا الىپ، ەسكەرتۋ جاسادى، دەپ حابارلايدى قازاقپارات ءتىلشىسى.

«وقۋشىلاردى جاڭا وقۋ جىلىندا ءقاۋىپسىز ءارى تازا مەكتەپپەن جانە قاجەتتى قۇرال-جابدىق، وقۋلىقتارمەن قامتۋ اسا ماڭىزدى. 1- قىركۇيەكتە بالالاردىڭ سانالى تاربيە جانە ساپالى ءبىلىم الۋىنا تولىق جاعداي جاسالۋى كەرەك. وعان ءبىرىنشى كەزەكتە جەرگىلىكتى اتقارۋشى ورگاندار، ياعني ءبىلىم باسقارمالارى جاۋاپتى ەكەنىن ەسكە سالامىن. وڭىرلەر بويىنشا اتىراۋ جانە اقمولا وبلىستارىنىڭ ءالى دە تولىق دەڭگەيدە دايىن ەمەس ەكەنى ايتىلدى. بۇل جەردە ماسەلە قاۋىپسىزدىككە قاتىستى. اسىرەسە اتىراۋ وبلىسى بىرنەشە رەت اتالدى»، - دەدى عاني بەيسەمبايەۆ اتالعان ۆەدومستۆونىڭ اپپارات وتىرىسىندا.

سونداي-اق مينيستر اتىراۋ وبلىسى ءبىلىم باسقارماسىنىڭ باسشىسىنا وقۋ جىلىنا دايىندىق بويىنشا شۇعىل شارالار قابىلداۋ كەرەكتىگىن جۇكتەدى.

«اقمولا وبلىسى بويىنشا مەكتەپتەردەگى كۇردەلى جوندەۋ جۇمىستارىنىڭ 1- قىركۇيەككە دەيىن بىتپەۋى مۇمكىن. سونىمەن قاتار قاۋىپسىزدىك بويىنشا ياعني بەينەباقىلاۋ كامەرلارىن جەدەل جەلى ورتالىعىنا تىكەلەي قوسۋ بويىنشا دا ماسەلەلەر بار. پاۆلودار وبلىسى، سىزدەردە دە كۇردەلى جوندەۋ بويىنشا ماسەلەلەر بار كورىنەدى. ەڭ باستىسى بالالاردىڭ قاۋىپسىزدىگى، ءبىلىم باسقارمالارىنىڭ باسشىلارى سول سۇراققا سىزدەر تىكەلەي جاۋاپتىسىزدار»، - دەيدى ول.

ودان بولەك، ۆەدومستۆو باسشىسى وقۋ جىلىنا دايىندىق بارىسى ۇكىمەت وتىرىسىندا قارالعانىن جانە ءبىلىم ءبولىمى باسشىلارىنىڭ بارلىق شارۋا 1- قىركۇيەككە دەيىن بىتەتىنى تۋرالى ۋادە بەرىلگەنىن ەسكە سالدى.