ەگىس القابى قۋراپ كەتكەن شارۋالاردىڭ شىعىنى وتەلەدى - مينيستر

استانا. قازاقپارات - جامبىل وبلىسىندا قۇرعاقشىلىققا بايلانىستى ەگىس القابى قۋراپ كەتكەن فەرمەرلەردىڭ شىعىنى وتەلەدى.

بۇل تۋرالى ۇكىمەت وتىرىسىنان كەيىن ب ا ق وكىلدەرىنىڭ ساۋالىنا جاۋاپ بەرگەن اۋىل شارۋاشىلىعى ءمينيسترى ەربول قاراشوكەيەۆ ايتتى، دەپ حابارلايدى قازاقپارات ءتىلشىسى.

«جامبىل وبلىسىندا القاپتاردى سۋارۋ كەزەڭىندە سۋ تاپشىلىعى بولدى. اتاپ ايتقاندا، كورشىلەس قىرعىزستاننان سۋ كەلمەدى. سوندىقتان جامبىل وبلىسىندا قۋراپ كەتكەن القاپتار بار. ولاردىڭ اۋماعى - 7,8 مىڭ گەكتار. وسىعان بايلانىستى ۇكىمەت ايماقتىق دەڭگەيدەگى توتەنشە جاعداي جاريالاۋ شەشىمىن قابلدادى»، - دەپ جاعدايدى ءتۇسىندىردى ەربول قاراشوكەيەۆ.

مينيستر قۋاڭشىلىقتان زارداپ شەككەن ەگىس القاپتارىندا بولىپ، جاعدايىمەن تانىسقانىن جەتكىزدى.

ول اتاپ وتكەندەي، شارۋالارعا كەلگەن زالال مەملەكەت ەسەبىنەن وتەلەدى.

«ايماقتىق دەڭگەيدەگى توتەنشە جاعداي جاريالانعاندا القاپتارعا جۇرگىزىلگەن عىلىمي-ساراپتامالىق نەگىزدەمەگە ساي رەزەرۆتەن قاراجات بولىنەدى. ول اقشا شىعىن كورگەن فەرمەرلەرگە بەرىلەدى»، - دەيدى ەربول قاراشوكەيەۆ.

ەسكە سالايىق، بىرنەشە ساعات بۇرىن پرەمەر-ءمينيستردىڭ وكىمىمەن سۋ تاپشىلىعى بولعان جامبىل وبلىسىنداعى 6 اۋداندا وڭىرلىك اۋقىمداعى تابيعي سيپاتتاعى توتەنشە جاعداي جاريالاندى.

سونىمەن قاتار بۇگىن وتكەن ۇكىمەت وتىرىسىندا پرەمەر-مينيستر ءاليحان سمايىلوۆ بيىل قۇرعاقشىلىق سالدارىنان جينالاتىن ءونىم كولەمى ازايىپ قالۋى مۇمكىن ەكەنىن ايتتى.