ۇ ب ت تاپسىرۋ كەزىندە قۋلىققا بارعان تالاپكەرلەر گرانتتى قايتارىپ بەرەدى

استانا. قازاقپارات - عىلىم جانە جوعارى ءبىلىم ءمينيسترى ساياسات نۇربەك ۇ ب ت- دا تالاپكەردىڭ كومپيۋتەرىنە ونلاين قوسىلىپ، جوعارى بال الۋعا كومەكتەسكەندەر ماسەلەسىنە تۇسىنىك بەردى، دەپ حابارلايدى قازاقپارات ءتىلشىسى.

«ءبىز ۇلتتىق قاۋىپسىزدىك كوميتەتىمەن وتە تىعىز جۇمىس ىستەيمىز. وزدەرىڭىز بىلەتىندەي، تەست تاپسىرمالارى مەن ولاردىڭ مازمۇنى «مەملەكەتتىك قۇپيا تۋرالى» زاڭنىڭ وبەكتىسى سانالادى. سوندىقتان مۇندا ۇ ق ك تەرگەۋ جۇرگىزەدى. بيىل بارلىق وڭىردە كوميتەتتىڭ دەپارتامەنتتەرى تىكەلەي باقىلاۋ جۇرگىزدى. ءبىزدىڭ ۇلتتىق تەستىلەۋ ورتالىعىنىڭ وكىلدەرىمەن بىرگە جۇمىس ىستەدى»، - دەدى مينيستر ب ا ق وكىلدەرىنىڭ ساۋالىنا ۇكىمەت وتىرىسىنان كەيىن.

ۆەدومستۆو باسشىسى تەكسەرۋ بارىسىندا جۇزدەگەن ولقىلىق اشكەرە بولعانىن اتاپ ءوتتى. ناقتى سانى ءالى دە انىقتالۋدا.

«سوڭعى مالىمەتكە ساي، 300 دەن استام تالاپقا سايكەس كەلمەۋ فاكتىلەرى انىقتالدى. وسى جاعدايلاردىڭ ءارقايسىسى بويىنشا ۇ ق ك جانە ۇلتتىق تەستىلەۋ ورتالىعىنىڭ وكىلدەرىمەن بىرلەسىپ، قوسىمشا تەرگەۋ جۇرگىزىلەدى. ەگەر اقپارات راستالسا، وندا بال جويىلادى. ەگەر وسى ۋاقىتقا دەيىن تالاپكەر گرانت يەگەرى اتانىپ ۇلگەرسە، وندا ول ونى كەيىن قايتارادى. تيىسىنشە، گرانت قايتا ۇلەستىرىلەدى. قىركۇيەك ايىندا ناقتى بەلگىلى بولادى. ەڭ جوعارى بال جيناعان، ءبىراق گرانت الماعان ۇمىتكەرلەر اراسىندا وسى گرانتتار قايتا بولىنەدى»، - دەپ تۇيىندەدى ساياسات نۇربەك.

ءمينيستردىڭ سوزىنشە، ماسەلەنىڭ ناقتى ءمان-جايى انىقتالىپ، ناتيجەسى قىركۇيەك ايىنىڭ ورتاسىنا قاراي جاريالانادى.

ەسكە سالايىق، بۇعان دەيىن ۇ ب ت- دا تالاپكەردىڭ كومپيۋتەرىنە قاشىقتان قوسىلىپ، جوعارى بال الۋعا كومەكتەسكەن كۇدىكتىلەر ۇستالعانىن جازىپ ەدىك.