ىستىقكولدە كوكبورىدەن الەم كۋبوگىندا قازاق كومانداسى ەكىنشى ورىن الدى

استانا. قازاقپارات - كوكبورىدەن (جوعارعى ليگا) الەم كۋبوگىنىڭ جەڭىمپازى قىرعىزستاننىڭ «ىنتىماق» كومانداسى بولدى، دەپ حابارلايدى قازاقپارات كابار اقپارات اگەنتتىگىنە سىلتەمە جاساپ.

ولار فينالدا قازاقستاندىق «استانا» كومانداسىمەن كەزدەستى. قوس كوماندانىڭ كەزدەسۋى 10:1 ەسەبىمەن اياقتالدى.

وسىلايشا، «ىنتىماق» كومانداسىنا التىن مەدالدار مەن 2 ميلليون سومعا سەرتيفيكات، «استانا» كومانداسىنا كۇمىس مەدال مەن 2 ملن سومعا سەرتيفيكات تابىستالدى.

ال ءۇشىنشى ورىن العان «دوستىق» كومانداسى 800 مىڭ سوم جەڭىپ الدى.

ايتا كەتەيىك، ءبىرىنشى ليگادا جەڭىمپاز اتانعان قىرعىزستاننىڭ «جاشتىق» كومانداسىنىڭ اقشالاي جۇلدەسى 2 ميلليون سوم بولدى.

ءبىرىنشى ليگا جەڭىمپازدارىنىڭ ءتىزىمى:

- ءبىرىنشى ورىن: «جاشتىك» (قىرعىزستان) - 2 ميلليون سوم؛

- ەكىنشى ورىن «كراسنويارسك» (رەسەي) - 1 ميلليون سوم؛

- ءۇشىنشى ورىن «وزبەكستان» (وزبەكستان) - 500 مىڭ سوم؛

- ءتورتىنشى ورىن «التاي» (رەسەي) - 250 مىڭ سوم.

45 جاستان اسقان قاتىسۋشىلار اراسىندا وتكەن جارىستا ءبىرىنشى ورىندى قىرعىزستاننان كەلگەن كوماندا (600 مىڭ سوم) ، ەكىنشى ورىندى «قازاقستان» كومانداسى (400 مىڭ سوم) يەلەندى.

ەسكە سالا كەتەيىك، كوكبورىدەن حالىقارالىق تۋرنير 13-تامىزدا باستالعان. ونىڭ اشىلۋ سالتاناتىنا قىرعىزستان پرەزيدەنتى سادىر جاپاروۆ قاتىستى.

كوكبورى (كوكپار) - قازاق، قىرعىز، التاي، باشقۇرت، وزبەك جانە باسقا دا ازيا حالىقتارى اراسىندا تانىمال ات سپورتى ويىنى. ويىنشىلار ات ۇستىندە سەركەگە تالاسادى.

ونى قارسىلاستارىنا الدىرىپ قويماي، قارسى كوماندانىڭ تايقازانىنا تاستاۋى كەرەك.

بيىل جارىسقا جاڭا ەرەجە ەنگىزىلىپ، ويىنداعى تورەشى سانى بەسكە دەيىن كوبەيدى.

ءبىر تايمنىڭ ۇزاقتىعى 15 مينۋتقا قىسقاردى (بۇرىن 20 مينۋت بولاتىن) . سەركە تايقازانعا تۇسكەننەن كەيىن ويىنشى ات ۇستىندە الاڭدا بولۋى كەرەك.