قازاقستاننىڭ حالىقارالىق كينولوگيا فەدەراتسياسىنا قوسىلۋ ماسەلەسى جەنيەۆادا تالقىلانىپ جاتىر

جەنەۆا. قازاقپارات - بۇگىن جەنيەۆادا حالىقارالىق كينولوگيا فەدەراتسياسى باس اسسامبلەياسىنىڭ وتىرىسى باستالدى.

جيىندا تالقىعا شىعارىلعان ماسەلەنىڭ ءبىرى - قازاقستان كينولوگتارى وداعىن فەدەراتسيانىڭ تولىققاندى مۇشەلىگىنە قابىلداۋ، دەپ حابارلايدى قازاقپارات.

داۋىس بەرۋ راسىمىنە 77 مەملەكەت قاتىسادى. قازاقستاننىڭ ۇمىتكەرلىگىنە قاتىستى وڭ شەشىم قابىلدانۋى ءۇشىن ولاردىڭ باسىم بولىگى قولداۋ بىلدىرۋگە ءتيىس.

قازاقستان كينولوگتارى وداعى ءۇشىن FCI مۇشەسى بولۋ - وتە ماڭىزدى، سەبەبى مۇشە مەملەكەت رەتىندە قازاقى يت تۇقىمدارى تازى مەن توبەتتى حالىقارالىق دەڭگەيدە تانىتۋ ءۇشىن فەدەراتسياعا ءوتىنىش بەرە الادى.

ەكى كۇنگە سوزىلعان باس اسسامبلەيانىڭ وتىرىسىنان كەيىن «World Dog Show-2023» دۇنيەجۇزىلىك چەمپيوناتى باستالادى.

تاريحتا العاش رەت بۇل چەمپيوناتقا قازاقستاننان بارعان تازى تۇقىمدى ەكى يت قاتىسادى.

2022 -جىلى مەملەكەت باسشىسى قاسىم- جومارت توقايەۆ ءتيىستى مەملەكەتتىك ورگاندارعا ۇلتتىق يت تۇقىمدارى - قازاقى تازى مەن توبەتتى ساقتاۋ جانە قالپىنا كەلتىرۋ، سونداي- اق ولاردى ءتولتۋما قازاقى يت تۇقىمدارى رەتىندە حالىقارالىق دەڭگەيدە تانىتۋدى تاپسىرعان بولاتىن.

بۇل ماسەلەنى ق ر پرەزيدەنتى ءىس باسقارماسى ءوز قاراۋىنا الىپ، جۇمىستى جۇيەلى تۇردە شەشۋ ءۇشىن مەملەكەتتىك ورگانداردىڭ جۇمىسىن ۇيلەستىرۋمەن شۇعىلداندى.

پرەزيدەنت تاپسىرماسى بويىنشا ءتيىستى جۇمىس توبى قۇرىلىپ، ەكولوگيا جانە تابيعي رەسۋرستار مينيسترلىگى وكىلەتتى ورگان رەتىندە ايقىندالدى.

ەسكە سالا كەتەيىك، بۇعان دەيىن جەنيەۆادا ۇيىمداستىرىلاتىن «World Dog Show-2023» يتتەر كورمەسىنە قازاقستاننان ەكى تازى قاتىساتىنىن حابارلاعان ەدىك.