اباي قۇنانباي ۇلى تۋرالى قىزىقتى دەرەكتەر

استانا. قازاقپارات – بۇگىن ءبىز اباي قۇنانباي ۇلىنا قاتىستى قىزىقتى دەرەكتەردى ۇسىنامىز.

اباي قۇنانباي ۇلى 10 جاسىنان باستاپ ولەڭ جازا باستاعان. ءوز تۋىندىسىن كوكبايدىڭ اتىنان جاريالاعان ول ەل باسقارۋ شارۋالارىنا 13 جاسىنان ارالاسقان. 21 جاسىندا بولىس بولادى.

اقىننىڭ العاشقى ماحابباتى - توعجان. ول ءبىرىنشى جارى ءدىلداعا 1860 -جىلى 15 جاسىندا، ەكىنشى ايەلى ايگەرىمگە 30 جاسىندا ۇيلەنگەن. امەڭگەرلىك جولمەن العان ايەلىنىڭ ەسىمى - ەركەجان. ول ابايدىڭ ءىنىسى - وسپاننىڭ قالىڭدىعى.

ونىڭ ساياسي كوزقاراسىنىڭ قالىپتاسۋىنا ىقپال ەتكەن ءبىرقاتار ورىس زيالىسى بار. ولار: ە. ميحاەليس، ا. لەونتيەۆ، س. گروسس، ا. بلەك، پ. لوبانوۆسكي، ن. كونشين، ن. دولگوپولوۆ جانە تاعى باسقا.

اباي كوكبايعا «ناۋرىزباي تۋرالى» داستان جازۋدى تاپسىردى. دەسەك تە، ناۋرىزباي باتىردىڭ اقاۋىزىن سۋرەتتەگەن تۇسىنا كوڭىلى تولماي «شوقپارداي كەكىلى بار قامىس قۇلاق» اتتى ولەڭىن جارىققا شىعارادى. بۇل شىعارمادا سۋرەتتەلەتىن ارعىماق تا اقاۋىزعا ۇقساماي، كوكباي جازعان «ناۋرىزباي - فاتيما» اتتى جىرعا ەنبەي قالادى.

مۇحتار اۋەزوۆ جازعان «اباي جولى» رومانى ساياسي تالاپقا بايلانىستى «بۇرمالانعان» دەگەن دەرەك بار. ماسەلەن، بايدىڭ قىزى ءدىلدا مەن جاعدايى تومەن وتباسىدان شىققان ايگەرىم ەكەۋىنىڭ وبرازى اۋىسقان دەپ ايتىلادى.