ەۋروپادا تاعى اپتاپ ىستىق بولادى: قانداي ايماقتار زارداپ شەگەدى
ەۋروپادا دەمالىس كۇندەرى اۋا تەمپەراتۋراسى كۇرت كوتەرىلىپ، اپتاپ ىستىق بولادى.
شۆەيتساريا مەن فرانتسيانىڭ مەتەورولوگيالىق اگەنتتىكتەرىنىڭ حابارلاۋىنشا، ىستىق اۋا رايى يسپانيادان كەيىن ورتالىق ەۋروپاعا ءوتىپ، كەلەسى اپتانىڭ سوڭىنا دەيىن باسىلمايدى.
فرانسيا، شۆەيتساريا، گەرمانيانىڭ وڭتۇستىگى جانە يتاليانىڭ سولتۇستىگىندە وسىنداي اۋا رايى بولادى.
يتاليادا اپتاپ ىستىقتىڭ ءۇشىنشى تولقىنى
يتاليا وسى جازدا اپتاپ ىستىقتىڭ ءۇشىنشى تولقىنىمەن بەتپە- بەت كەلەدى. مەتەورولوگتار سەنبى جانە جەكسەنبى كۇندەرى وتە جوعارى تەمپەراتۋرا بولادى دەپ بولجاپ وتىر.
بۇل ەڭ الدىمەن ساحارادان الجير مەن ماروككو ارقىلى جىلى اۋا ماسسالارىنىڭ قوزعالىسىنا بايلانىستى.
«ىستىق اۋا ماسسالارى جىلۋ كۇمبەزىنىڭ استىندا قالادى، ونىڭ قاباتتارى جەرگە تۇسەدى»، - دەيدى مەتەورولوگتار.
بۇدان كوبىنە اۋا تەمپەراتۋراسى +40°س- قا جەتەتىن يتاليانىڭ سولتۇستىگىندەگى جازىقتار مەن تيررەن تەڭىزىنىڭ جاعالاۋى، سونداي- اق اۋا تەمپەراتۋراسى +42°س بولاتىن ساردينيا كوبىرەك زارداپ شەگەدى.
مەتەورولوگيالىق قىزمەتتەر فلورەنتسيا، ريم، بولونيا، فەررارا، بولتسانو، الەسساندريا جانە تەرني سياقتى قالالاردا اپتاپ ىستىقتىق بولاتىنىن ايتىپ، حالىققا ەسكەرتۋ جاسادى.
بولجامدارعا سايكەس، اۋا رايى 27-تامىزعا دەيىن وسىلاي بولادى.
فرانسيا تاريحتاعى ەڭ قاتتى ىستىققا دايىندالىپ جاتىر
فرانسيادا دەمالىس كۇندەرى جازعى داۋىل مەن جوعارى تەمپەراتۋراعا بايلانىستى ەسكەرتۋ جاسالدى.
الداعى بىرنەشە كۇندە ەلدىڭ وڭتۇستىگى تۇگەلدەي ىستىق اۋا كۇمبەزىنە اينالادى دەپ بولجانادى.
بۇل جەرورتا تەڭىزى جاعالاۋى مەن رونا اڭعارىنا كوبىرەك اسەر ەتەدى، مۇندا تەمپەراتۋرا 40°C جەتەدى.
فرانسيانىڭ ورتالىق جانە سولتۇستىگىندە دە تەمپەراتۋرا كوتەرىلەدى. مەتەورولوگتاردىڭ ايتۋىنشا، پاريجدە تەرمومەتر 35°C- قا دەيىن جەتەدى.
فرانسۋز مەتەورولوگيالىق اگەنتتىكتەرىنىڭ بولجاۋىنشا، قاتتى اپتاپ ىستىق كەلەسى اپتانىڭ ورتاسىنا نەمەسە سوڭىنا دەيىن ساقتالادى. مەتەورولوگتار بۇل تاريحتاعى ەڭ قاتتى ىستىق بولۋى مۇمكىن ەكەنىن ەسكەرتتى.
شۆەيتساريا مەن گەرمانيادا اۋا رايىنا بايلانىستى ەسكەرتۋ جاريالاندى
جۇما كۇنى بيلىك بۇكىل ەلگە 3-دەڭگەيدەگى ىستىققا بايلانىستى (بەس بالدىق شكالا بويىنشا) ەسكەرتۋ جاسادى.
جەنيەۆادا تەمپەراتۋرا 36°C- قا دەيىن كوتەرىلۋى مۇمكىن، اپتاپ ىستىق تولقىندار يۋرا اڭعارلارى مەن سولتۇستىك- باتىستى دا قامتيدى.
مۇنداي اۋا رايى بىرنەشە كۇن بويى ساقتالادى دەپ بولجانىپ وتىر.
گەرمانيا استاناسىندا اپتا باسىندا اۋا رايىنىڭ قاۋىپتى قىزىل دەڭگەيى جاريالاندى. دەمالىس كۇندەرى بەرليندە اۋا تەمپەراتۋراسى 32°C- قا دەيىن كوتەرىلەدى دەپ بولجاندى.
فرانكفۋرتتە سەنبىدەن باستاپ بەس كۇن بويى تەمپەراتۋرا 30 گرادۋستان اسادى، گامبۋرگتە دەمالىستىڭ ءبىرىنشى كۇنى 30,5°C- قا جەتەدى.