قىتايلىق كومپانيا اباي وبلىسىندا ەلەكتروموبيل قۇراستىراتىن زاۋىت سالۋعا نيەتتى

سەمەي. قازاقپارات - كولىك قۇراستىراتىن قىتايلىق كومپانيا اباي وبلىسىندا جاڭا زاۋىت سالۋعا ۇسىنىس ءبىلدىردى، دەپ حابارلايدى قازاقپارات ءتىلشىسى.

اباي وبلىسى اكىمدىگىنىڭ مالىمەتىنە سۇيەنسەك، ءوڭىر اكىمىنىڭ ورىنباسارى ديميتري گاريكوۆ جانە اكىمدىكتىڭ قۇرىلىمدىق باسقارما باسشىلارى قىتايلىق Geely كومپانياسىنىڭ وكىلدەرىمەن كەزدەستى.

كەزدەسۋ بارىسىندا شەتەلدىك كومپانيا ەلەكتر قوزعالتقىشتى، كوممەرتسيالىق جانە مامانداندىرىلعان تەحنيكالاردى تانىستىردى. قىتاي تاراپى ەلەكتروندى فورماتتا اۆتوموبيلدەر جەلىسىنىڭ تۇساۋكەسەرىن ۇسىنىپ، ەكىجاقتى ءوزارا ءىس- قيمىل ىنتىماقتاستىق ماسەلەلەرىن تالقىلادى.

«سونىمەن قاتار Geely كومپانياسىنىڭ وكىلدەرى سەمەي قالاسىنىڭ اۋماعىندا ەلەكتروموبيل قۇراستىراتىن زاۋىت سالۋ ماسەلەسىن كوتەردى. بۇل باعىتتا كەلىسسوزدەر ارى قاراي جالعاسادى. بۇدان بولەك، كومپانيا ءارتۇرلى كلاستاعى اۆتوبۋستار، تاكسيلەر مەن ەلەكتر قۋاتتاندىرۋ ستانسالارىنىڭ جابدىقتارىن ءوندىرۋدى ۇسىنىپ وتىر»، - دەلىنگەن اقپاراتتا.

ەسكە سالساق، وسىعان دەيىن اباي وبلىسىندا جەكە كاسىبىن باستاعىسى كەلەتىن كوپبالالى وتباسىلارعا 70 گرانت بەرىلەتىندىگى حابارلانعان.