جاڭا وقۋ جىلى قارساڭىندا قانداي وزگەرىستەر بولدى
بۇل تۋرالى وقۋ- اعارتۋ ءمينيسترى عاني بەيسەمبايەۆ مەملەكەت باسشىسىنا جاڭا وقۋ جىلىنا دايىندىق جۇمىستارى تۋرالى بايانداۋ كەزىندە ايتتى، دەپ حابارلايدى قازاقپارات.
«قازىر مەكتەپ الدىنداعى دايارلىققا بايلانىستى ءتيىستى جۇمىستار ىسكە اسىرىلىپ جاتىر. ءبىرىنشى كەزەكتە تاربيەشىلەردىڭ ەڭبەكاقىسى 30 پايىزعا كوتەرىلىپ جاتىر. 1- قىركۇيەكتەن باستاپ بالاباقشاعا باراتىن از قامتىلعان وتباسىلارداعى 97 مىڭنان استام بالا تەگىن تاماقپەن قامتاماسىز ەتىلەدى. بالاباقشادا 30 مىڭ ورىن اشىلىپ وتىر جانە جىلدىڭ اياعىنا دەيىن تاعى دا 51 مىڭ ورىن اشۋ جوسپارلانعان. قازىرگى كەزدە بالالاردىڭ 89 پايىزى (2 دەن 6 جاسقا دەيىنگى) قامتىلعان. سونىمەن قاتار جىلدىڭ سوڭىنا دەيىن كەزەكتىلىك ماسەلەسى بويىنشا ءبىرىڭعاي بازا ىسكە قوسىلادى»، - دەدى ع. بەيسەمبايەۆ.
ونىڭ ايتۋىنشا، جەرگىلىكتى بيۋدجەت قاراجاتى ەسەبىنەن از قامتىلعان وتباسىلارداعى وقۋشىلار 0 مەكتەپ فورماسىمەن جانە كەڭسە تاۋارلارىمەن قامتاماسىز ەتىلەدى. بيىل جالپىعا بىردەي ءبىلىم بەرۋ قورى 65 ملرد تەڭگەدەن استام سومانى قۇرادى. وسى ورايدا 460 مىڭ وقۋشىعا ماتەريالدىق كومەك بەرۋ جوسپارلانعان.
«1- قىركۇيەكتەن باستاپ 1,4 ميلليون بالا (باستاۋىش سىنىپتارداعى) تەگىن ىستىق تاماقپەن قامتاماسىز ەتىلەدى. 1- قىركۇيەككە دەيىن بارلىق ءبىلىم بەرۋ مەكەمەسى جەدەل باسقارۋ ورتالىعىنا، ليتسەنزيالانعان كۇزەتكە، دابىل جۇيەسىنە قوسىلۋى ماسەلەسى تولىققاندى جۇيەلى تۇردە شەشىلىپ وتىر. مەكتەپتەردىڭ 65 پايىزى مودەرنيزاتسيادان ءوتتى. وسىعان دەيىن 1 مىڭ پاندىك كابينەتتەر اشۋ جوسپارلانسا، ونىڭ ورنىنا 1700 كابينەت اشىلادى»، - دەدى مينيستر.
ونىڭ سوزىنە قاراعاندا، جىل سوڭىنا دەيىن 154 مەكتەپ پايدالانۋعا بەرىلەدى. مۇنىمەن قوسا، 260 مەكتەپتە كۇردەلى جوندەۋمەن قامتىلعان. سونىڭ اراسىندا 194 ءى جاڭا وقۋ جىلىنا دەيىن تاپسىرىلادى.
ۆەدومستۆو باسشىسى بيىل كوللەدج ستۋدەنتتەرىنىڭ شاكىرتاقىسى 50 پايىزعا ءوسىپ جاتقانىن اتاپ ءوتتى.
بۇدان بۇرىن حابارلانعانداي، وقۋ- اعارتۋ ءمينيسترى عاني بەيسەمبايەۆ مەملەكەت باسشىسىنا جاڭا وقۋ جىلىنا دايىندىق جۇمىستارى تۋرالى باياندادى.