ءاليحان سمايىلوۆ «ارسەلورميتتال تەمىرتاۋداعى» اۋديتتەردى جەدەل اياقتاۋدى تالاپ ەتتى

استانا. قازاقپارات - پرەمەر- مينيستر ءاليحان سمايىلوۆ قاراعاندى وبلىسىنداعى «ارسەلورميتتال تەمىرتاۋ» ا ق- نىڭ «قازاقستان» شاحتاسىندا بولعان جاعداي بويىنشا كەڭەس وتكىزدى، دەپ حابارلايدى قازاقپارات ۇكىمەتتىڭ باسپا ءسوز قىزمەتىنە سىلتەمە جاساپ.

ءبىرىنشى كەزەكتە ۇكىمەت باسشىسى وقيعا سالدارىنان قازا تاپقان كەنشىلەردىڭ تۋىستارى مەن جاقىندارىنا كوڭىل ايتتى. قاراعاندى وبلىسىنىڭ اكىمى ەرماعانبەت بولەكپايەۆتىڭ بايانداۋىنشا 17 -تامىزدا ساعات 10:05 تە شاحتادا كونۆەيەرلىك تاسپاسى تۇتانعان. جەدەل ارەكەت ەتۋ شەڭبەرىندە اپاتتى جويۋ جوسپارى دەرەۋ ىسكە قوسىلىپ، جۇمىسشىلاردى جەر ۇستىنە شىعارۋ ۇيىمداستىرىلدى. وقيعا بولعان كەزدە شاحتادا 227 ادام بولعان. ساعات 13:50 دەگى جاعداي بويىنشا 222 كەنشى جەر ۇستىنە شىعارىلدى. شاحتادا قاتتى ءتۇتىننىڭ بولۋىنا بايلانىستى تاعى بەس كەنشى شىعا المادى.

قۇتقارۋ جۇمىستارى بارىسىندا ساعات 17:20 دا ءبىر كەنشىنىڭ دەنەسى تابىلدى. 18 -تامىزدا ساعات 08:10 دا جوعالعان ەكىنشى كەنشىنىڭ دەنەسى تابىلدى. قازىرگى ۋاقىتتا تاعى ءۇش كەنشىنى ىزدەۋ جۇمىستارى جالعاسىپ جاتىر. تەمپەراتۋرانىڭ جوعارى بولۋىنا، شاحتانى ءتۇتىن باسۋىنا جانە سايكەسىنشە، ءوندىرىس ورنىنىڭ قولجەتىمسىزدىگىنە بايلانىستى ءورت وشاعى ءالى دە وقشاۋلانباعان.

قازىرگى ۋاقىتتا شىققان ءورتتى شاحتانىڭ وزگە جاعىنان ءسوندىرۋ بويىنشا شارالار جۇرگىزىلىپ جاتىر. دەنساۋلىق ساقتاۋ ءبىرىنشى ۆيتسە- ءمينيسترى تيمۋر سۇلتانعازييەۆتىڭ حابارلاۋىنشا اپات سالدارىنان 13 ادام زارداپ شەككەن.

ولاردىڭ توعىزى ۋلى گازدارمەن ۋلانىپ، ونىڭ ىشىندە اۋىر دارەجەدە ءيىس ءتيىپ، ح. ج. ماقاجانوۆ اتىنداعى كوپسالالى اۋرۋحاناعا جەتكىزىلدى.

بۇگىندە ەكى شاحتەر جان ساقتاۋ بولىمىنەن اۋىستىرىلدى. ناۋقاستاردىڭ جاعدايى - ورتاشا اۋىرلىق دارەجەدە، تۇراقتى. ەسىن بىلەدى. تاعى ءتورت ادام شاحتينسك قالاسىنىڭ ورتالىق اۋرۋحاناسىنا جەتكىزىلدى. ەكى ادام امبۋلاتوريالىق ەمدەلۋگە جىبەرىلدى، تاعى ەكى ادام ستاتسيونارلىق ەم قابىلداپ جاتىر، ولاردىڭ جاعدايى - ورتاشا اۋىرلىق دارەجەدە.

كەڭەس قورىتىندىسى بويىنشا پرەمەر- مينيستر «قازاقستان» شاحتاسىنداعى اپاتتىڭ سەبەپتەرىن جان- جاقتى تەكسەرۋ ءۇشىن كوميسسيانىڭ جۇمىسىن ساپالى قامتاماسىز ەتۋدى جانە زارداپ شەككەن وتباسىلارعا بارلىق قاجەتتى كومەكتى كورسەتۋدى تاپسىردى.

ءاليحان سمايىلوۆ ءتيىستى شەشىمدەر قابىلداۋ ءۇشىن تجم مەن ەكولوگيا جانە تابيعي رەسۋرستار مينيسترلىكتەرىنە «ارسەلورميتتال تەمىرتاۋ» ا ق- دا جۇرگىزىلىپ جاتقان ونەركاسىپ جانە ەكولوگيالىق اۋديتتەردى جەدەل اياقتاۋدى تالاپ ەتتى.