الماتىدا ستۋدەنتتەرگە ارنالعان داعدارىس ورتالىعى ىسكە قوسىلدى

الماتى. قازاقپارات - جاڭا وقۋ جىلى قارساڭىندا ستۋدەنتتەرگە ارنالعان داعدارىس ورتالىعى ىسكە قوسىلدى. مۇنداي ورىندار ەلىمىز بويىنشا استانا، الماتى جانە مەن شىمكەنت قالالارىنان اشىلدى، دەپ حابارلايدى قازاقپارات ءتىلشىسى.

عىلىم جانە جوعارى ءبىلىم مينيسترلىگى وكىلدەرىنىڭ ايتۋىنشا، بيىل ءۇش مەگوپوليستە العاش رەت داعدارىس ورتالىعى جۇمىسىن باستادى. استانا مەن الماتىدا 30 دان، ال شىمكەنتتە 20 ورىنعا لايىقتالعان. بۇل جەردە ستۋدەنت جاتاقحاناعا ورنالاسقانشا 1-2 كۇن تۇنەپ شىعا الادى. ەشكىم دالادا قالمايدى.

«وعان قوسا ءاربىر جوعارى وقۋ ورنىنىڭ جانىنان احۋال ورتالىعى دا قۇرىلدى. مۇنىڭ بارلىعى ۇلكەن قالالارعا ءبىلىم ىزدەپ كەلگەن ستۋدەنتتەردى جاتاقحانامەن قامتاماسىز ەتۋ ءۇشىن جاسالىپ جاتىر»، - دەپ جازدى عىلىم جانە جوعارى ءبىلىم مينيسترلىگىنىڭ تەلەگرام كانالى.

ستۋدەنتتەر جاتاقحاناعا ءوتىنىشتى ونلاين تۇردە جىبەرەدى. جاۋابى 1 كۇن ىشىندە بەرىلەدى. ال جاتاقحانا جەتپەگەن جاعدايدا حوستەلگە ورنالاستىرادى. الماتى قالاسى بويىنشا قىركۇيەككە دەيىن جاڭاسى بار، قايتا جاسالعانى بار 5 جاتاقحانا قولدانىسقا بەرىلەدى. بۇل دەگەنىڭىز 1600 گە جۋىق ورىن. وعان قوسىمشا جىل سوڭىنا دەيىن ءدال وسىنداي 14 نىساننىڭ قۇرىلىسى اياقتالىپ، 4 مىڭعا تارتا ستۋدەنت جاتاقحاناعا ورنالاسادى.

ەسكە سالا كەتەيىك، جاتاقحانادا تۇراتىن اتا-اناسىنىڭ قامقورلىعىنسىز قالعان جاستار مەن مۇگەدەكتىگى بار ستۋدەنتتەرگە وتەماقى تولەنەدى. ونىڭ كولەمى - جىلىنا 29 ايلىق ەسەپتىك كورسەتكىش.