رەلتورلار پاتەر جالدايتىن كەزدە الاياقتاردان وتە ساق بولۋعا شاقىرادى
قازاقستاننىڭ ءوزىن-ءوزى رەتتەيتىن رەلتورلار قاۋىمداستىعى پرەزيدەنتىنىڭ كەڭەسشىسى نينا لۋكيانەنكو اتاپ وتكەندەي، وقۋ جىلىنىڭ الدىندا ستۋدەنتتەردىڭ كەلۋىنە بايلانىستى تامىز ايىندا تۇرعىن ءۇيدى جالعا الۋ باعاسىنىڭ ءوسۋى قالىپتى جاعداي.
«ءبىز نارىقتىق ەكونوميكادا كوپتەن بەرى ءومىر ءسۇرىپ كەلەمىز جانە باعالار ۇسىنىس پەن تولەمگە قابىلەتتى سۇرانىستىڭ اسەرىنەن قالىپتاساتىنىن ءبارى جاقسى تۇسىنەدى. قازىر بايقالىپ وتىرعان نارسە، ارينە، پاتەردى جالعا الۋعا سۇرانىس ارتىپ كەلەدى. بۇل وبەكتيۆتى، ماۋسىمدىق جانە جىل سايىن قايتالاناتىن ءۇردىس. ءبىر جاعىنان كوپتەگەن ج و و-نىڭ ءوز ستۋدەنتتەرىن كامپۋس، جاتاقحانا جانە باسقا دا تۇراقپەن قامتاماسىز ەتە الماۋىنا بايلانىستى. باعالار جاقىن ارادا شارتتى
تۇردە -15 عا كوتەرىلەدى. تامىز ايىندا كوتەرىلگەن باعا قازان ايىندا كەنەتتەن تومەندەيدى دەۋگە دە بولمايدى. سەبەبى ستۋدەنتتەر كەم دەگەندە مامىر ايىنا دەيىن تۇراقتى بولادى. ولار قازىر پاتەرلەردى اي سايىن جالعا المايدى»، - دەدى ن. لۋكيانەنكو.
جالعا الۋشىلار تۇرعىن ءۇي نارىعىندا كەزدەسەتىن الاياقتىققا تاپ بولاتىن كەزدەرى از ەمەس. بۇنى بولدىرماۋ ءۇشىن رەلتورلار قاۋىمداستىعىنىڭ وكىلى تۇرعىن ءۇيدىڭ عانا ەمەس، مەنشىك يەسىنىڭ دە قۇجاتتارىمەن مۇقيات تانىسۋدى ۇسىنادى.
«ەڭ الدىمەن، ءسىز جىلجىمايتىن مۇلىكپەن تانىسىپ، قانداي دا ءبىر كەلىسسوزدەر جۇرگىزگەن كەزدە، بۇل دەپوزيت نەمەسە جالداۋ شارتى بولسىن، ءسىز كىممەن كەلىسسوز جۇرگىزىپ جاتقانىڭىزدى ءبىلۋىڭىز كەرەك. كەز-كەلگەن كەلىسىم-شارت، مەيلى ول دەپوزيت بولسىن، مەيلى جالداۋ شارتى بولسىن، ول مەنشىك يەسىنىڭ وزىمەن جاسالۋى كەرەك. جالعا الۋشىلار مەن ساتىپ الۋشىلار پاتەر قۇجاتتارىن سۇراپ قانا قويادى، جەكە كۋالىكتى سۇرامايدى. بۇل ۇلكەن قاتەلىك. پاتەر قۇجاتتارىن تەكسەرۋ سول پاتەر يەسىنىڭ جەكە كۋالىگىنەن باستالاتىنىن ءتۇسىنۋ ماڭىزدى. كوپ ادام بۇل جايتتى ەسكەرمەيدى. ەكىنشىدەن، كەز كەلگەن كەلىسىم جازباشا تۇردە بولۋى كەرەك. ءسىز كەلىسكەن جاعدايدى ناقتى تالقىلاۋىڭىز كەرەك. كەز كەلگەن كەلىسىمشارتتى جازباشا تۇردە جاساۋعا بولادى. ەگەر قۇجاتقا ەكى تاراپ قول قويسا، وندا ونىڭ تولىق زاڭدى كۇشى بولادى. نوتاريالدى كۋالاندىرىلعان كەلىسىم-شارتتىڭ عانا نەگىزى بولۋى مۇمكىن دەپ ويلاۋ قاتە تۇسىنىك. جىلجىمايتىن مۇلىك سالاسىنداعى كەلىسىم جازباشا تۇردە جاسالۋى كەرەك»، - دەپ اتاپ ءوتتى ول.
كوپشىلىك قاراجاتتى ۇنەمدەۋ ماقساتىندا دەلدال كومەگىنە جۇگىنگىسى كەلمەي، ءبىراق ناتيجەسىندە «سۇر» رەلتورلارعا تاپ بولادى، دەيدى ن لۋكيانەنكو.
«رەلتوردىڭ قىزمەتىنەن اقشا ۇنەمدەگىسى كەلەتىن جالعا الۋشىلاردىڭ ۇلكەن قاتەلىگى، ولار تومەن باعاداعى حابارلاندىرۋعا سەنىپ، پاتەر يەسىنە تىكەلەي شىعىپ، اقپاراتتىق قىزمەت كورسەتەتىن كومپانيامەن شارت جاساي وتىرىپ، 10، 15 نەمەسە 20 مىڭ تەڭگە الدىن- الا تولەمىن قالدىرىپ كەتەدى. شارت بويىنشا ولارعا پاتەر جالعا بەرەتىن يەلەرىنىڭ نومىرلەرىن بەرۋ ۋادە ەتىلەدى. سوندىقتان رەلتورلىق قىزمەت كورسەتۋ شارتتارىن مۇقيات وقىپ شىعۋ قاجەت. اتالعان جاعدايدا ءسىز تەك پاتەر يەلەرىنىڭ تەلەفون نومەرلەرىن ساتىپ الدىڭىز، پاتەردىڭ ءوزىن ەمەس، جانە دە جالداۋ شارتىن جاسامادىڭىز. بۇل اقشانى قايتارۋ مۇمكىن ەمەس، ويتكەنى كومپانيا سىزبەن اقپاراتتىق قىزمەت كورسەتۋ تۋرالى عانا شارت جاساسادى»، - دەپ ءبولىستى ول.
ءوز كەزەگىندە قازاقستاننىڭ ءوزىن-ءوزى رەتتەيتىن رەلتورلار قاۋىمداستىعىنىڭ مۇشەسى ورىنباسار ساتايەۆ قاۋىمداستىق سايتىندا سەنىمدى رەلتورلار مەن كومپانيالاردى تابۋعا بولاتىنىن اتاپ ءوتتى.
«الاياقتىق جاعدايىندا، ەگەر جالعا الۋشى قاۋىمداستىققا مۇشە كومپانيالاردىڭ قۇربانى بولسا ءبىز ىشكى قىزمەتتىك تەكسەرۋ جۇرگىزىمىز. بار جاعدايدى، ەكى تاراپتى دا تالداپ، تەكسەرەمىز. بۇل ۋاقىتقا دەيىن بىزدە ونداي جاعدايلار تىركەلگەن جوق. جالپى، قاۋىمداستىققا مۇشە بولۋدىڭ ءوز شارتتارى جانە دە بارلىق سەرىكتەس كومپانيا جۇمىس بارىسىندا قولداناتىن ءوز كودەكسىمىز بار. باسقا جاعدايدا، الاياقتىق قۇربانى سوتقا جۇگىنۋى كەرەك. استانا مەن الماتى سياقتى ءىرى قالالاردا الاياقتارعا تاپ بولماس ءۇشىن ءبىزدىڭ قاۋىمداستىقتىڭ سايتىنا كىرىپ، تەكسەرىلگەن كومپانيالار مەن اگەنتتىكتەردىڭ تىزىمىمەن تانىسۋعا بولادى»، - دەپ ءبولىستى و. ساتايەۆ.
سونداي-اق، ول الاياقتار ءۇيدى جالعا الۋعا دەگەن سۇرانىستىڭ تومەن، ءتىپتى تاپشىلىق جاعدايىندا دا ايلاسىن ىسكە اسىراتىنىن ايتتى.
«حابارلاندىرۋ سايتتارىندا اۋداندار بويىنشا تومەن جانە جوعارى باعاداعى پاتەرلەردى تابۋعا بولادى. كەي حابارلاندىرۋلار باعانى ەڭ تومەنگى باعادان %-30 تومەن كورسەتەدى، دەمەك وعان بارلىعى حابارلاسىپ، تەز جالعا الۋدى ويلايدى. الاياقتاردىڭ ماقساتى - جالعا الۋشىنى اسىقتىرۋ، ويتكەنى تومەن باعانى كورىپ، كوبى جىلجىمايتىن مۇلىكتى يەمدەنۋگە اسىعادى، ال الاياقتار وزگەنىڭ اقشاسىن تەزىرەك يەمدەنەدى. وسىلايشا، كوپ جاعدايدا الاياقتار كەلىسىم-شارتسىز بىرەۋدىڭ مەنشىگىندەگى پاتەردى جالعا وتكىزەدى»، - دەپ اتاپ ءوتتى سپيكەر.