فيلمدى قازاقشا كورەتىندەر كينوعا تۇندە بارۋعا ءماجبۇر. قازاقشا دۋبلياج ماسەلەسى تالقىلاندى
ا. ورالوۆ ۆيتسە-مينيسترلەردىڭ، كوميتەت ءتوراعالارىنىڭ جانە باعىنىستى مەكەمە باسشىلارىنىڭ قاتىسۋىمەن اپپارات كەڭەسىن وتكىزدى. كۇن تارتىبىندەگى باستى تاقىرىپ - كورەرمەن سۇرانىسىنا يە كاسسالىق فيلمدەردى مەملەكەتتىك تىلدە دۋبلياجداۋ.
«جىل باسىنان قازاقستاندا بىرنەشە ءىرى كينوپرەمەرا ءوتتى. ولاردىڭ كەيبىرى قازاق تىلىندە دۋبلياجدىڭ بولماۋىنا بايلانىستى كورەرمەننىڭ نازارىنان تىس قالدى. مەن حالىقتىڭ پىكىرىن باقىلاپ وتىرمىن. بۇل ماسەلەنى ەشقاشان ەستەن شىعارمايمىز. كاسسالىق فيلمدەر اۋديتورياعا مەملەكەتتىك تىلدە قولجەتىمدى بولۋى كەرەك. مىسالى، بىلتىر مادەنيەت جانە سپورت مينيسترلىگىنىڭ قولداۋىمەن كورەرمەن قىزىعۋشىلىعىن تۋدىرعان 3 كينوپرەمەرا قازاق تىلىندەگى دۋبلياجبەن شىقتى. بيىل مادەنيەت سالاسىن دامىتۋدىڭ 7 جىلدىق تۇجىرىمداماسىن ازىرلەپ، ۇكىمەت قاۋلىسىمەن بەكىتتىك. ەندى جىل سايىن كەم دەگەندە 15 كينوپرەمەراعا قازاق تىلىندە دۋبلياج جاسالۋى كەرەك دەگەن مىندەت قويدىق»، - دەدى اسحات ورالوۆ.
ايتا كەتەيىك، ناۋرىز ايىندا مادەنيەت جانە سپورت مينيسترلىگى مەملەكەتتىك تىلگە دۋبلياج جاساۋ ءۇشىن فيلمدەردى ىرىكتەۋ ەرەجەسىن بەكىتتى. سولاي، بىرنەشە جىلدا جالپى پروكاتتاعى قازاق تىلىندەگى فيلمدەردىڭ ۇلەسىن 0 دەيىن جەتكىزۋ جوسپارلانىپ وتىر. بۇل كورسەتكىش كاسسالىق شەتەلدىك فيلمدەرگە مەملەكەتتىك تىلدە دۋبلياج جاساۋ ارقىلى دا ارتۋى ءتيىس.
«تاعى ءبىر وزەكتى ماسەلە - قازاقشا دۋبلياجبەن شىعاتىن كارتينالار سەانسى ءاردايىم كورەرمەنگە ىڭعايلى ۋاقىتتا قويىلا بەرمەيدى. بۇل تۋرالى دا ماعان الەۋمەتتىك جەلىدە ءجيى جازادى. فيلمدى مەملەكەتتىك تىلدە كورگىسى كەلەتىندەر كوبىنەسە تۇندە كينوعا بارۋعا ءماجبۇر. بۇل، ارينە، دۇرىس ەمەس. ءبىز كينوتەاترلاردىڭ جەكەمەنشىك كاسىپ نىسانى ەكەنىن تۇسىنەمىز. دەگەنمەن دە، مەملەكەتتىك تۇرعىدان ءبىز دۇنيەجۇزى كورەتىن كينوپرەمەرالاردىڭ قازاق تىلىندە جانە ىڭعايلى ۋاقىتتا كورسەتىلۋىن قامتاماسىز ەتۋگە مىندەتتىمىز. سوندىقتان جەكە كاسىپكەرلەرمەن، كينوتەاترلاردىڭ يەلەرىمەن وسى باعىتتاعى جۇمىستى جانداندىرۋىمىز قاجەت»، - دەدى اسحات ورالوۆ.