ءار اۋىل اكىمى مەكتەپ تۋرنيكتەرىنە ءوزى تارتىلىپ كورۋى كەرەك

وسكەمەن. قازاقپارات - شىعىس قازاقستان وبلىسىنىڭ اكىمى ەرمەك كوشەربايەۆ اۋىل اكىمدەرىنە مەكتەپ اۋلالارىنداعى تۋرنيككە اسىلىپ كورىپ، قاۋىپسىزدىگىن تەكسەرۋدى تاپسىردى، دەپ حابارلايدى قازاقپارات ءتىلشىسى.

ش ق و اكىمدىگىندە وتكەن جينالىس بارىسىندا ايماق باسشىسى ەرمەك كوشەربايەۆ مەكتەپتەردەگى بالالاردىڭ قاۋىپسىزدىگى ءارقاشان باستى نازاردا بولۋى كەرەكتىگىن جەتكىزدى. زايسان اۋدانىنىڭ اكىمىنە «قانشا مەكتەپتى تەكسەردىڭىز، ءوزىڭىز تۋرنيككە شىعىپ كوردىڭىز بە؟» دەپ سۇرادى. ءجوندى جاۋاپ الا الماعاننان كەيىن اۋداندارداعى ءاربىر مەكتەپ ستاديونىنىڭ قاۋىپسىزدىگىن جەكە تەكسەرەتىندىگىن ايتتى.

«ءوزىم مەكتەپكە بارىپ تەكسەرىپ، ەگەر ءبىر كەمشىلىك انىقتاسام جۋرناليستەردى شاقىرىپ، كورسەتىپ، «وسى اكىم بالالاردىڭ قاۋىپسىزدىگىن ويلامايدى» دەپ ايتامىن. سوسىن سايلاۋعا قالاي تۇسەسىزدەر!؟ سول ءۇشىن اۋىل اكىمدەرى ءار مەكتەپتەگى تۋرنيككە وزدەرى شىعىپ، تەكسەرۋى، جاعدايدى ءوز باقىلاۋىندا ۇستاۋى كەرەك»، - دەدى اكىم.

جالپى شىعىس قازاقستان وبلىسىنداعى 343 مەكتەپ 1-قىركۇيەكتە 98 مىڭنان استام وقۋشىنى قابىلدايدى. ولاردىڭ 9654 ى ءبىرىنشى سىنىپ وقۋشىلارى.

ەسكە سالايىق، تامىز ايىنىڭ باسىندا استانا قالاسىنداعى مەكتەپ اۋماعىندا 10 جاسار بالانىڭ ۇستىنە فۋتبول قاقپاسى قۇلاپ كەتكەن بولاتىن. بالا كوز جۇمىپ، تەرگەۋ باستالدى.