استانالىق ءماسليحات دەپۋتاتى شەتەل تۇلعالارىنا كوشە اتاۋىن بەرۋگە قارسى شىقتى
«قازاق قوناقجاي حالىقپىز عوي. باسقا مەملەكەتتىڭ باسشىلارى كەلىپ جاتسا، سول ەلدىڭ تاريحي تۇلعاسىنا كوشە اتاۋىن بەرەمىز. نەگىزى بۇل دۇرىس ەمەس. سىرتقى ىستەر مينيسترلىگى پرەزيدەنتكە سىلتەيدى دە، انانىڭ، مىنانىڭ اتىنا كوشە بەر دەيدى. قازاقستانعا ول ەل باسشىسى كەلەدى، كەتەدى. ال كوشە ماڭگىلىككە قالادى، سوندا ءبىز ءوز بالالارىمىزعا نە دەيمىز؟ مىسالى، ۇلىبريتانيانىڭ پاتشايىمى ەكاتەرينا Ⅱ اتىنا سكۆەر اتاۋىن بەردىك. ونىڭ بىزگە قانداي قاتىناسى بار؟ ءوز تۇلعالارىمىز جوق پا؟ نەگە ءبىز بۇل ماسەلەنى ويلاستىرمايمىز؟»، - دەدى باۋىرجان سمايىلوۆ قالالىق ءماسليحاتتىڭ وتىرىسىندا.
ونىڭ ايتۋىنشا، كوشە اتاۋىن بەرۋدە جوعارى جاققا سىلتەي بەرمەي، ناقتى ۇسىنىس ايتۋ قاجەت.
«ءبىز ساياساتتى تۇسىنەمىز، ءبىراق ماسەلەنى جان-جاقتى قاراۋ كەرەك. سونىمەن قاتار كوشەلەردى رەسمي تۇردە اشۋىمىز قاجەت. ودان بولەك، كەيبىر كوشە اتاۋىن ەكى رەت بەرىپ جاتىرمىز. مىسالى، استانادا الپامىس كوشەسى جانە الپامىس باتىر كوشەسى بار. بۇل جەردەگى پروبلەما، تاكسي جانە جەدەل جاردەم شاقىرعاندا قاتەلەسەدى. بۇنى ءبىر تارتىپكە كەلتىرۋ كەرەك. بۇعان دەيىن دە قانشا رەت ايتىپ كەلەمىز»، - دەيدى ەلوردا ءماسليحاتىنىڭ دەپۋتاتى.
بۇعان دەيىن حابارلاعانىمىزداي، استانادا ەلىمىزگە جانە الەمگە تانىمال تۇلعالاردىڭ كوشەلەرى پايدا بولماق.