ەلوردادا ىسكەرلىك اۋداندار جوباسى ىسكە اسىرىلماق
«ءبىز كولىك- اۋىستىرىپ وتىرعىزۋ توراپتارىن قۇرۋدى ۇسىنامىز. ولاردى راديالدى باعىتتاردىڭ قيىلىسىندا ۇسىنىپ وتىرمىز. ماسەلەن، مۇنداي كولىك- اۋىستىرىپ وتىرعىزۋ تورابىن جاڭا مەشىت اۋدانىندا قۇرۋعا بولار ەدى. ولاردى «ىسكەرلىك اۋداندار جوباسى» دەپ تە اتاۋعا بولادى. مۇنداي توراپتار تەك كولىك ينفراقۇرىلىمىن، ياعني پاركينگتى، تەرمينالداردى، لرت؛ برت ستانسالارىن عانا ەمەس، سونىمەن بىرگە ساۋدا ويىن- ساۋىق كەشەندەرىن، بيزنەس ورتالىقتاردى، ساۋدا زالدارىن قامتيدى»، - دەدى ول «استانا قالاسىنىڭ 2035 -جىلعا دەيىنگى باس جوسپارىنىڭ» جاڭا جوباسى بويىنشا قوعامدىق تالقىلاۋ اياسىندا قازاقپارات تىلشىسىنە بەرگەن سۇحباتىندا.
ونىڭ اتاپ وتۋىنشە، مۇنداي كولىك توراپتارى قالاعا ۇلكەن كىرەبەرىستەردىڭ بارىندە قۇرىلادى.
«ايتالىق، ەگەر ادام قوسشىدان كەلە جاتسا، اتالعان توراپقا كولىگىن قالدىرىپ، قوعامدىق كولىككە اۋىسىپ ءمىنىپ، قالاعا بارادى. مۇنداي توراپتار قالانىڭ بارلىق راديالدى كىرەبەرىستەرىندەگى بارلىق قيىلىستاردا سالىنادى. ياعني، قوسشى، قورعالجىڭ تاس جولى، قوستاناي، كوكشەتاۋ، قاراعاندى باعىتتارىندا بولادى»، - دەدى اقمارال تەمىروۆا.
استانا باس جوسپارى وكىلىنىڭ اتاپ وتۋىنشە، وسىلايشا اتالعان كولىك- اۋىستىرىپ وتىرعىزۋ توراپتارى قالاماڭى ايماعىنىڭ بارلىق كولىك جۇكتەمەسىن وزىنە جينايدى.
«جوسپاردىڭ ەسەپتى كەزەڭى - 2035 -جىل. دەگەنمەن، ءبىز 2050 -جىلعا دەيىن قامتىپ وتىرمىز. ويتكەنى 2050 -جىلعا قاراي ايتارلىقتاي جۇكتەمە بولادى جانە حالىق سانى ارتادى. كوشە- جول جەلىسىنە جۇكتەمەنى ازايتۋ، قالاداعى اۆتوموبيلدەر سانىن تومەندەتۋ ءۇشىن سىرتتان كەلەتىن جەكە كولىكتەردى بارىنشا قىسقارتۋىمىز قاجەت»، - دەدى ول.
جوبالاۋ ينستيتۋتىنىڭ جەتەكشى ساۋلەتشىسى ازامات وشاحمەتوۆ مۇنداي ىسكەرلىك اۋداندار قالانىڭ 6 جەرىندە سالىناتىندىعىن ناقتىلاي ءتۇستى.
«6 جەردە ىسكەرلىك اۋداندار سالىنادى. ماسەلەن، قازىرگى ۋاقىتتا پاۆلودار مەن قوستانايدان كۇنىنە شامامەن 100 مىڭ ادام ءجۇرىپ وتەدى. قالا ورتالىعىنا وسى جۇكتەمەنى بولدىرماۋ ءۇشىن اتالعان جوبانى ۇسىنىپ وتىرمىز. ول جەردە بيزنەس ورتالىقتارى، پاركينگ، قوناق ۇيلەر، سۋپەرماركەتتەر، ساۋدا ويىن- ساۋىق ورتالىقتارى، ءتىپتى كەلۋشىلەرگە ىڭعايلى بولۋى ءۇشىن حالىققا قىزمەت كورسەتۋ ورتالىقتارى مەن سالىق ورگاندارى دا بولادى»، - دەدى ول.
ايتا كەتەرلىگى، بۇل جوبا ءالى كەلىسۋ ساتىسىندا قارالىپ جاتىر.