ءدىندى قارۋعا اينالدىرىپ الدىق - اكتەر بەكجان تۇرىس
جۇرگىزۋشى قازىر جاستار ءدىن ۇستازدارىن جانە يمامداردى كوپ تىڭدايتىنىن جانە سونداي باعىت سىلتەيتىن يمامدار دا كوبەيگەنىن ايتتى. ول جاستاردىڭ بۇل نارسەگە فاناتتىق دەڭگەيدە قارايتىنىن ەسكەرە كەتتى. وسىعان قاتىستى اكتەردىڭ پىكىرىن سۇرادى.
«قازىر ەرىنبەگەننىڭ ءبارى دىنمەن الىساتىن بولدى. كەشەگى ءبىزدىڭ اتالارىمىز «قۇرمەتتىڭ ۇلكەنى - دىنگە دەگەن قۇرمەت» دەيدى، ءبىراق تازا اقىلدىڭ باعىتىمەن تابىلماعان ءدىن شىنايى ەمەس. بىزدە ءدىندى ءالى جالاڭ سەنىم رەتىندە قابىلدايتىندار كوپ. ءوزىڭىز ايتقانداي، جاڭاعى يمامداردىڭ ۋاعىزىن ەستيدى، وزدەرى قۇراندى تولىعىمەن وقىپ بىتىرمەگەن، ءبىراق كەيدە ساعان اقىل ايتقىسى كەلىپ تۇرادى، سەنى دۇرىس جولعا سالعىسى كەلىپ تۇرادى. مەنىڭ ىلعي ايتىپ جۇرگەن ءبىر ءسوزىم بار: ساقتان قالعان سالتىم، عۇننان قالعان عۇرپىم، تۇركىدەن قالعان جۇرتىم بار. قازاقتىڭ ءدىنى مەن ءدىلى، دىڭگەگى، ءىلىمى ىلكى جۇرتتان دا ىلگەرى بولادى. بۇگىنگىدەي دارەجەگە ەمەس، دالانىڭ دانالىق زاڭىنا باعىنىپ ءجۇرمىز. كۇن ايى ەتەگىندە، قۇدايى جۇرەگىندە قۇرمەت تۇتقان حالىق بولاتىنبىز.
قازىر شىنىمەن دە وسى ءدىن توڭىرەگىندە ءارتۇرلى اڭگىمەلەر ايتىلادى. ونى كورىپ ءجۇرمىز. كەيدە ايتىلىپ جاتقان ءسوزدىڭ توڭىرەگىندەگى اڭگىمەلەردىڭ ءوزى اناۋ جاھيلدىق داۋىرگە، پايعامبار زامانىنا كەتىپ قالادى. مەن نەگە قازىرگىمەن ۇشتاستىرمايمىز دەپ ايتامىن.
الەۋمەتتىك تۇرمىس-سالتىمىز، ءبىتىم-بولمىسىمىز يسلاممەن بىتە قايناسقان بولاتىن. ءدىن ۇستاي الساڭ قاسيەتىڭ، ۇستاي الماساڭ قاسىرەتىڭ دەيدى. ءبىراق سول قاسيەتتى ءبىز قازىر قارۋعا اينالدىرىپ العان سياقتىمىز. ءدىن ءبىزدىڭ تاريحىمىزدىڭ، مادەنيەتىمىزدىڭ جانە ادەبيەتىمىزدىڭ ءبىر بولىگى. فاناتتىق دەڭگەيدە ءدىننىڭ سوڭىنان كەتىپ بارا جاتقان جاستار بار. ءبىراق ءوزىنىڭ ءداستۇرىن دە، ادەپ-عۇرپىن دا جوعالتپاعان ۇرپاق تا كوپ»، - دەدى اكتەر.
ەسكە سالايىق، بەكجان تۇرىس - اكتەر جانە تەلەجۇرگىزۋشى، تەاتر قايراتكەرى، قازاقستاننىڭ ەڭبەك سىڭىرگەن قايراتكەرى جانە «دارىن» مەملەكەتتىك جاستار سىيلىعىنىڭ لاۋرەاتى.
Massaget.kz