وقۋعا ەكى اپتا قالعاندا وسكەمەن مەكتەبىندە جوندەۋ باستالدى، قالا اكىمى كەلىپ تاپسىرما بەردى

وسكەمەن. قازاقپارات - شىعىس قازاقستان وبلىسى ورتالىعىنداعى №12-مەكتەپ-گيمنازياسىندا جوندەۋ ءجۇرىپ جاتىر.

جۇمىس بارىسىن قالا اكىمى جاقسىلىق ومار تەكسەرىپ قايتتى، دەپ حابارلايدى قازاقپارات Altaynews-قا سىلتەمە جاساپ.

مەردىگەر ۇيىم عيماراتتىڭ توبەسىن جوندەپ جاتىر، 1-قىركۇيەككە دەيىن جۇمىستى اياقتاۋعا مىندەتتەلگەن. قۇرىلىسقا وبلىس بيۋدجەتىنەن قاراجات بولىنگەن.

وسكەمەن قالاسىنىڭ اكىمى جاقسىلىق ومار وقۋ ورنىنىڭ اكىمشىلىگىنە جوندەۋ بارىسىن ءجىتى باقىلاۋدى تاپسىردى.

«30-تامىزدا جوندەۋ جۇمىستارى تولىق اياقتالۋى ءتيىس. كۇن رايىن سىلتاۋ ەتپەڭىزدەر. بۇل وتە جاقسى مەكتەپ. مەكتەپ ديرەكتورى كۇن سايىن قۇرىلىسشىلاردىڭ جۇمىسىن تەكسەرىپ، قانداي دا ءبىر كەمشىلىك بولسا، ماعان حابار بەرەدى. ەگەر جۇمىس ۋادەلەسكەن ۋاقىتتا بىتپەسە وندا باسقاشا سويلەسۋگە تۋرا كەلەدى»، - دەدى قالا باشىسى مەردىگەرلەرگە.