قىتايمەن شەكاراداعى «باقتى» وتكىزۋ پۋنكتى جابىلادى

استانا. قازاقپارات - قىتايمەن شەكاراداعى «باقتى» وتكىزۋ پۋنكتى بىرنەشە كۇنگە جابىق بولادى، دەپ حابارلايدى قازاقپارات ق ر قارجى مينيسترلىگى مەملەكەتتىك كىرىستەر كوميتەتىنىڭ باسپا ءسوز قىزمەتىنە سىلتەمە جاساپ.

بيىلعى جىل باسىنان ەۋرازيالىق ەكونوميكالىق وداق ەلدەرىنىڭ كەدەندىك شەكاراسىنىڭ قازاقستان بولىگىندە ورنالاسقان وتكىزۋ پۋنكتەرىن جاڭارتۋ جانە تەحنيكالىق قوسىمشا جاراقتاندىرۋ جۇرگىزىلىپ جاتىر. وسىعان بايلانىستى قازاقستان- قىتاي شەكاراسىنداعى «باقتى» اۆتوموبيل وتكىزۋ پۋنكتى قايتا جاڭارتىلۋدا.

جۇمىستاردى جۇرگىزۋ كەستەسىنە سايكەس 18-20-تامىز ارالىعىندا سۋمەن جابدىقتاۋدىڭ سىرتقى جەلىلەرىن توسەۋ جوسپارلانعان. سۋ جەلىلەرى وتكىزۋ پۋنكتىنىڭ اۆتوموبيل جولى ارقىلى وتەتىندىكتەن، اتالعان كۇندەر ارالىعىندا كەدەن بەكەتى كولىك قۇرالدارى ءۇشىن جابىق بولادى.

«باقتى» وتكىزۋ پۋنكتىنىڭ اشىلۋى 2023 -جىلعى 21-تامىزدان باستاپ شتاتتىق رەجيمدە جوسپارلانىپ وتىر.

كەلتىرىلگەن قولايسىزدىقتار ءۇشىن كەشىرىم سۇرايمىز»، - دەلىنگەن كوميتەت مالىمەتىندە.