امەريكاداعى نەشنل گەوگرافيك جۋرالىنىڭ فوتوگرافى اقبوكەندەردى ءتۇسىرۋ ءۇشىن الماتىعا كەلدى

الماتى. قازاقپارات - الماتى حايۋاناتتار باعىنا امەريكا قۇراما شتاتتارىنان بەلگىلى فوتوگراف- ناتۋراليست دجوەل سارتورە ارنايى كەلدى، دەپ حابارلايدى قازاقپارات ءتىلشىسى.

دجوەل سارتورە 20 جىلدان استام ۋاقىتتان بەرى ايگىلى National Geographic جۋرالىندا جۇمىس ىستەيدى.

جانۋارلار الەمىن فوتوسۋرەتتەرگە ءتۇسىرىپ جۇرەتىن مامان - The National Geographic Photo Ark جوباسىنىڭ نەگىزىن قالاۋشى ءارى جەتەكشىسى.

«تابيعات قامقورشىسى، جانۋارلاردىڭ جاناشىرى دجوەل مىرزا الماتىعا ءۇش كۇنگە عانا جۇمىس ساپارىمەن كەلگەن. نەگىزگى ماقساتى - حالىقارالىق تابيعاتتى قورعاۋ وداعىنىڭ قىزىل كىتابىنا ەنگەن اقبوكەندەر مەن ۇلارلاردى سۋرەتكە ءتۇسىرىپ، قۇجاتتاپ الۋ. الماتى حايۋاناتتار باعى الەمدە اقبوكەندەر ۇستايتىن ساناۋلى زووباقتاردىڭ ءبىرى. ول ءوز سۋرەتتەرىن اق-قارا فوندا تۇسىرەدى»، - دەپ حابارلادى الماتى زووباعىنان.

دجوەل مىرزا بۇل جۇمىسپەن 25 جىلدان بەرى اينالىسىپ كەلەدى.

فوتوگرافتىڭ بۇل جوباسى الەمنىڭ زووباقتارى مەن قورىقتارىنداعى بارلىق قورعالاتىن جانۋارلار تۇرلەرىن قۇجاتتاۋعا باعىتتالعان.

ول وسى ۋاقىتقا دەيىن 12000 جانۋار تۇرلەرىن سۋرەتكە تۇسىرگەن.

«جارىقتى پايدالانۋ - جانۋارلاردىڭ شىنايى تۇستەرىن بەرەدى، ال - قارا جانە اق فون نازارىڭدى باسقا جاققا بۇرماي، جانۋارلاردىڭ تىكەلەي كوزىنە قاراۋعا مۇمكىندىك بەرەدى»، - دەيدى فوتوگراف دجوەل.

ونىڭ سۋرەتتەرى وتە شىنايى جانە ساپالى. كادرداعى كىشكەنتاي تىشقان دا، ۇلكەن ءپىل دە جاندى ءارى ەرەكشە اسەرگە بولەيدى.

فوتوگراف ءوز جۇمىستارى ارقىلى ادامداردى جانۋارلاردىڭ ماسەلەسىنە ايرىقشا كوڭىل بولۋگە شاقىرادى.

ول 20 -جىلدان استام ەڭبەك جولىندا 20000 جانۋاردى سۋرەتكە ءتۇسىرۋدى جوسپارلاپ وتىر.

«مەن سۋرەتكە تۇسىرگەن جانۋارلار تۇرلەرىنىڭ كەم دەگەندە u-80 جويىلىپ كەتۋدەن امان قالۋى مۇمكىن. دەگەنمەن، ول ءۇشىن ادامدار ولاردىڭ بار ەكەنىن ءبىلۋى كەرەك، ادامدار ولارعا قامقور بولىپ، سۇيىسپەنشىلىكپەن قاراۋعا ءتيىس. ادامدار جانۋارلارعا قالاي كومەكتەسە الاتىنىن بىلۋگە ۇمتىلۋى كەرەك. ەگەر دە جانۋارلار جويىلىپ كەتسە، ءبىز دە جويىلىپ كەتۋىمىز مۇمكىن ەكەنىن ادامدار سەزىنۋى ءتيىس»، - دەيدى دجوەل سارتورە.