ەلىمىزدە ءۇش اۋىسىمدا وقىتاتىن نەشە مەكتەپ بار

استانا. قازاقپارات - قازاقستاندا 70 تەن استام مەكتەپ اپاتتى دەپ تانىلدى، دەپ حابارلايدى قازاقپارات ءتىلشىسى.

«قازىرگى تاڭدا ەلىمىزدە 71 مەكتەپتىڭ عيماراتى اپاتتى دەپ تانىلعان. 136 مەكتەپ ءۇش اۋىسىمدا وقىتادى»، - دەلىنگەن وقۋ-اعارتۋ مينيسترلىگىنىڭ «قازاقپارات» اگەنتتىگىنە بەرگەن جاۋابىندا.

بۇل تۇرعىدا ۆەدومستۆو قاي وڭىرلەردە ءۇش اۋىسىمداعى جانە اپاتتى مەكتەپتەر ماسەلەسىن شەشۋ كەرەك ەكەنىن ناقتىلادى.

«پروبلەمالىق مەكتەپتەردىڭ سانى الماتى (53)، باتىس قازاقستان (26)، تۇركىستان (20)، ماڭعىستاۋ (17)، اتىراۋ (16) وبلىستارىندا باسىم»، - دەپ اتالىپ وتكەن مينيسترلىك اقپاراتىندا.

بۇدان بۇرىن حابارلانعانداي، 2025-جىلى ءۇش اۋىسىمدى جانە اپاتتى جاعدايداعى مەكتەپتەر پروبلەماسىن تولىق شەشۋ جوسپارلانعان.

بيىل اتىراۋ وبلىسىندا اپاتتى مەكتەپتەر پروبلەماسى تولىق شەشىلەدى.

شىمكەنتتە دە ءۇش اۋىسىمدى مەكتەپتەردىڭ ماسەلەسى وسى جىلى تولىعىمەن شەشىلەدى.