ۆيزالىق رەجيمدى جەڭىلدەتۋ، سانكسيادان قورعاۋ - ەۋروپارلامەنت دەپۋتاتتارى قازاقستانعا كەلەدى
بۇل تۋرالى ق ر سىرتقى ىستەر مينيسترلىگىنىڭ رەسمي وكىلى ايبەك سمادياروۆ ءمالىم ەتتى.
«ساپار اياسىندا ەۋروپارلامەنت دەلەگاتسياسىنىڭ ق ر مەملەكەتتىك كەڭەسشىسى ەرلان قارينمەن، ق ر پارلامەنتى ءماجىلىسىنىڭ حالىقارالىق ىستەر، قورعانىس جانە قاۋىپسىزدىك كوميتەتىنىڭ ءتوراعاسى ايگۇل قۇسپانمەن، ق ر ادام قۇقىقتارى جونىندەگى ۋاكىلى ارتۋر لاستايەۆپەن، ءبىرقاتار مەملەكەتتىك ورگان باسشىلىعىمەن كەزدەسۋلەرى جوسپارلانعان»، - دەدى رەسمي وكىل مينيسترلىكتىڭ اپتالىق بريفينگىندە.
كەلىسسوزدەر بارىسىندا تاراپتار قازاقستان مەن ەۋروپالىق وداق جانە ونىڭ مۇشە مەملەكەتتەرى اراسىنداعى كەڭەيتىلگەن ارىپتەستىك جانە ىنتىماقتاستىق تۋرالى كەلىسىمنىڭ ىسكە اسىرىلۋىنا قاتىستى پىكىر الماسادى.
«اتالعان قۇجات ۆيزالىق رەجيمدى جەڭىلدەتۋدى، قازاقستاندى سانكسيالاردىڭ تەرىس اسەرىنەن قورعاۋدى، «ورتا ءدالىزدى» جانە كولىكتىك ءوزارا بايلانىستى دامىتۋدى، اسا ماڭىزدى شيكىزات ماتەريالدارى سالاسىنداعى ىنتىماقتاستىقتى، كليماتتىڭ وزگەرۋىن جانە «جاسىل» ەنەرگەتيكانى قوسا العاندا، ءوزارا ءىس-قيمىلدىڭ 29 سالاسىن قامتيدى»، - دەدى ا. سمادياروۆ.