قازاقستاندىق ايەل كورەيادا اۆتوبۋس جۇرگىزۋشىسىنە پىشاقپەن شابۋىل جاساعان
20:13, 14 - تامىز 2023
استانا. قازاقپارات – ق ر سىرتقى ىستەر مينيسترلىگىنىڭ رەسمي وكىلى ايبەك سمادياروۆ وڭتۇستىك كورەيادا اۆتوبۋس جۇرگىزۋشىسىنە پىشاقپەن تاپ بەرگەن قازاقستاندىق ايەل تۋرالى ماعلۇمات بەردى، دەپ حابارلايدى قازاقپارات.
الەۋمەتتىك جەلىدە سەۋلدە قازاقستان ازاماتى اۆتوبۋس جۇرگىزۋشىسىنە پىشاقپەن شابۋىل جاساعانى حابارلانعان ەدى.
«جاقىندا سەۋلدان ءبىزدىڭ ازاماتىمىز جەرگىلىكتى تۇرعىنعا شابۋىل جاسادى دەگەن اقپارات الدىق. ماسەلەنىڭ ءمان-جايىن انىقتادىق. ول ايەلدىڭ ۇلتى كارىس، كۇيەۋى ەكەۋى كورەيادا ۇزاق جىلدار بويى تۇرىپ كەلەدى. وعان ەتنيكالىق ۆيزا بەرگەن جانە بيزنەسپەن اينالىسقان. 2020-جىلدان بەرى ارنايى اۋرۋحانادا ستاتسيونارلىق ەم الىپ كەلگەن. وقيعا بولعاندا دا دارىلىك پرەپارات ىقپالىندا بولۋى مۇمكىن»، - دەدى ايبەك سمادياروۆ مينيسترلىكتىڭ اپتالىق بريفينگىندە.
رەسمي وكىلدىڭ ايتۋىنشا، جاقىندا قازاقستان كونسۋلى ايەلدىڭ جاعدايىن بىلۋگە بارادى. ماسەلە تولىق باقىلاۋعا الىنعان.