قىتاي عالىمدارى ادام جۇرەگىنەن ميكروپلاستيك تاپتى

استانا. قازاقپارات - ادام جۇرەگىنىڭ تىندەرىنەن ادەتتە تاعام قاپتامالارى مەن بوياۋلاردا كەزدەسەتىن ميكروپلاستيكتەر تابىلدى.

جۇرەك-قان تامىرلارىنا وتا جاسالعان 15 ناۋقاستىڭ جۇرەك ءتىنىن تەكسەرگەن بەيجىڭدەگى انچجەن اۋرۋحاناسىنىڭ عالىمدار توبى الاڭداتارلىق تۇجىرىم جاسادى، دەپ حابارلايدى قازاقپارات New York Post-قا سىلتەمە جاساپ.

ميكروپلاستيك - 5 ميلليمەترگە جەتپەيتىن نەمەسە قارىنداشقا ارنالعان وشىرگىشتىڭ ولشەمىنە جۋىق پلاستيك بولشەگى. ول ادام اعزاسىنا اۋىز، مۇرىن جانە باسقا دەنە قۋىستارى ارقىلى ەنە الادى.

دارىگەرلەر كۋن حۋا مەن سيۋبين يان جانە ولاردىڭ كومانداسى بۇل بولشەكتەردىڭ ادامنىڭ جۇرەك- قان تامىرلارى جۇيەسىنە جاناما جانە تىكەلەي اسەر ەتۋ ارقىلى قالاي ەنەتىنىن بىلگىسى كەلگەن.

دارىگەرلەر پاتسيەنتتەردىڭ جۇرەك تىندەرىن، سونداي-اق جارتىسىنان قان ۇلگىلەرىن جيناپ، تالدادى.

ولار ءتىن ۇلگىلەرىنىڭ كوپشىلىگىنەن وننان مىڭعا دەيىنگى ميكروپلاستيكالىق بولشەكتەردى تاپتى. بارلىق قان ۇلگىلەرىنەن ميكروپلاستيكالىق بولشەكتەر انىقتالعان.

پلاستيكتىڭ توعىز ءتۇرى جۇرەك ءتىنىنىڭ بەس تۇرىنەن انىقتالدى. زەرتتەۋ سونىمەن قاتار كەيبىر ميكروپلاستيكالىق بولشەكتەردىڭ حيرۋرگيالىق ارالاسۋ كەزىندە دەنە قۋىسىنا ەنگەنىن دالەلدەدى.

جۇرەكتىڭ ءۇش ءتۇرلى بولىگىندە كەزدەسەتىن ميكروپلاستيكتەرگە پوليمەتيلمەتاكريلات كىردى. بۇل ادەتتە شىنىنىڭ ورنىنا سوققىعا ءتوزىمدى بالاما رەتىندە قولدانىلاتىن پلاستيك.

سونداي-اق كيىم-كەشەك پەن ازىق-تۇلىك ىدىستارىنا قولدانىلاتىن پوليەتيلەنتەرەفتالات پەن تەرەزە جاقتاۋلارىن، سۋ توگەتىن قۇبىرلاردى، بوياۋلاردى جانە ت. ب. جاساۋدا كەڭىنەن قولدانىلاتىن پوليۆينيلحلوريد (پۆح) تابىلدى.

«ءتىرى ورگانيزمنەن ميكروپلاستيك تابىلۋى الاڭداتارلىق جاعداي. ونىڭ جۇرەك تىنىنە قالاي ەنەتىنىن، سونداي-اق ونىڭ ۇزاق مەرزىمدى پەرسپەكتيۆادا جۇرەككە وپەراتسيادان كەيىنگى ىقتيمال اسەرىن زەرتتەۋ ءۇشىن قوسىمشا زەرتتەۋلەر قاجەت»، - دەپ قورىتىندىلادى زەرتتەۋ توبى.

وتكەن جىلعى زەرتتەۋ ناتيجەسىندە ادام اپتا سايىن شامامەن 5 گرام ۇساق پلاستيكالىق بولشەكتەردى تۇتىناتىنى دالەلدەنگەن. ال بۇل نەسيە كارتاسىنىڭ سالماعىنا تەڭ.

ۆەنا مەديتسينالىق ۋنيۆەرسيتەتىنىڭ عالىمدارى پلاستيكالىق بولشەكتەر ادامنىڭ تاماقتانۋ تىزبەگىنە وراۋ قالدىقتارىنان ەنىپ، دەنەگە تەڭىز تۇزى، تەڭىز ونىمدەرى، ءتىپتى اۋىز سۋ ارقىلى ەنەتىنىن انىقتاعان.

ميكروپلاستيكتەن تۋىنداعان اسقازان-ىشەك جولىنداعى وزگەرىستەر سەمىزدىك، قانت ديابەتى جانە باۋىردىڭ سوزىلمالى اۋرۋلارى سياقتى مەتابوليكالىق اۋرۋلارمەن بايلانىستى.