سپورت كۇنى: استانادا قانداي ءىس-شارالار ۇيىمداستىرىلماق

استانا. قازاقپارات - استانا قالاسى دەنە شىنىقتىرۋ جانە سپورت باسقارماسىنىڭ باسشىسى سامات جىلقىبايەۆ ەلوردادا سپورت كۇنى اياسىندا ۇيىمداستىرىلاتىن ءىس- شارالار جايىندا ايتىپ بەردى، دەپ حابارلايدى قازاقپارات ءتىلشىسى.

«جىل سايىن تامىزدىڭ ءۇشىنشى جەكسەنبىسى قازاقستاندا سپورت كۇنى اتالىپ وتەدى. بيىل بۇل داتا 20-تامىزعا سايكەس كەلىپ وتىر. قازاقستاندا سپورتتى دامىتۋ جولىندا بۇقارالىق سپورت قوزعالىسىنىڭ اۋقىمىن كەڭەيتۋگە جانە سپورت جەتىستىكتەرى ءۇشىن ىنتالاندىرۋعا باعىتتالعان مەملەكەتتىك ساياساتتىڭ ىقپالى زور.

سپورت كۇنىنە وراي 15-تامىز كۇنى Qazaqstan سپورت كەشەنىندە سالتاناتتى ءىس-شارا وتەدى.

18-تامىز كۇنى قالا اكىمدى مۇمكىندىگى شەكتەۋلى ادامداردى تاسىمالداۋعا ارنالعان ارنايى جابدىقتالعان Toyota Hience اتۆوكولىگىن تابىستايدى»، - دەدى س. جىلقىبايەۆ استانا قالاسى كوممۋنيكاتسيالار قىزمەتىندەگى باسپا ءسوز ءماسليحاتىندا.

سونىمەن قاتار بايقوڭىر، ەسىل، الماتى جانە سارىارقا اۋدانىنىڭ كىشكەنتاي تۇرعىندارى اراسىندا سپورت كۇنىنە ارنالعان «كوڭىلدى ستارت» ءىس-شاراسى ۇيىمداستىرىلماق.

ال ەسىل اۋدانى مەكەمەلەرىنىڭ قىزمەتكەرلەرى اراسىندا ۇستەل تەننيسىنەن تۋرنير وتكىزۋ جوسپارلانىپ وتىر.

«21-25-تامىز ارالىعىندا جاقسىلىق ۇشكەمپىروۆ اتىنداعى جەكپە- جەك سارايىندا دجيۋ- دجيتسۋدان جاسوسپىرىمدەر مەن كادەتتەر (U14- U21) اراسىنداعى الەم چەمپيوناتى وتەدى. بيىلعى باسەكەگە 42 ەلدەن 1200 دەن استام سپورتشى كەلەدى. ونىڭ ىشىندە وتانداستارىمىزدىڭ سانى - 194»، - دەدى باسقارما باسشىسى.