اقپارات مينيسترلىگى جۋرناليست ساندۋعاش دۇيسەنوۆا ىسىنە قاتىستى پىكىر ءبىلدىردى

استانا. قازاقپارات - اقپارات جانە قوعامدىق دامۋ مينيسترلىگى جۋرناليست ساندۋعاش دۇيسەنوۆاعا قۇقىقتىق كومەك كورسەتۋگە دايىن، دەپ حابارلايدى قازاقپارات مينيسترلىكتىڭ باسپا ءسوز قىزمەتىنە سىلتەمە جاساپ.

«جۋرناليست ساندۋعاش دۇيسەنوۆانىڭ ۇستالعانى راستالدى. اقپارات جانە قوعامدىق دامۋ مينيسترلىگى وقيعا بولعان ساتتەن ىشكى ىستەر ورگاندارىنا حابارلاسىپ، ماسەلەنىڭ ءمان-جايىن ءبىلدى. جەتىسۋ وبلىستىق پوليتسيا دەپارتامەنتىنىڭ مالىمەتىنشە، ساندۋعاش تالدىقورعاندا جەكە ءومىر مالىمەتتەرىن تاراتۋ تۋرالى ارىز بويىنشا ۇستالىپ، ەشقايدا كەتپەۋ جانە ءتيىستى مىنەز-قۇلىق تۋرالى قولحاتپەن شىعارىلعان. قازىرگى تاڭدا تەرگەۋ جۇمىستارى جۇرگىزىلىپ جاتىر. مينيسترلىك ماسەلەنى نازاردا ۇستايدى جانە جۋرناليسكە قانداي دا قۇقىقتىق كومەك كورسەتۋگە دايىن»، - دەپ جازدى مينيسترلىكتىڭ باسپا ءسوز حاتشىسى نۇربەك اميشا Facebook جەلىسىندە.

ەسكە سالا كەتەيىك، 11-تامىزدا جەتىسۋلىق جۋرناليست، ازاماتتىق بەلسەندى ساندۋعاش دۇيسەنوۆا ۇستالعان ەدى.

وعان ق ر قىلمىستىق كودەكستىڭ 147-بابى 5-بولىگى بويىنشا ايىپ تاعىلعان. بۇل باپتا ادامنىڭ جەكە ءومىرى تۋرالى اقپاراتتى تاراتقاندارعا جازا قاراستىرىلعان.

كەيىن بوساپ شىققان جۋرناليست ءوزىن پوليتسەيلەر بولىمشەدە شەشىندىرىپ، ۆيدەوعا تۇسىرگەنىن جەتكىزدى.

وسىعان وراي جەتىسۋ وبلىستىق پ د مالىمدەمە جاساپ، نەلىكتەن ۆيدەوعا تۇسىرگەنىن ءتۇسىندىردى.