قىرعىزستان نەگە قازاقستاندىق ديقاندارعا سۋ بەرمەي وتىر

بىشكەك. قازاقپارات - قىرعىزستان قازاقستان تاراپىنا، اتاپ ايتقاندا جامبىل وبلىسىنا سۋ بەرۋدى توقتاتتى.

وسىعان وراي قىرعىز رەسپۋبليكاسى اۋىل شارۋاشىلىعى مينيسترلىگى تۇسىنىك بەردى، دەپ حابارلايدى قازاقپارات 24.kg رەسۋرسىنا سىلتەمە جاساپ.

«قازاقستان رەسپۋبليكاسىنا جىل سايىن ۆەگەتاتسيالىق كەزەڭ باستالعانعا دەيىن ازىرلەنەتىن جانە شۋ- تالاس سۋ كوميسسياسىنىڭ تەڭ ءتوراعالارى قول قوياتىن كەستەگە سايكەس سۋ بەرىلەدى. ءبىراق 2023 -جىلى بۇل كەستە ماۋسىم ايىندا عانا كەلىسىلىپ، كوزدەردەگى سۋدىڭ ازدىعىنا بايلانىستى اعىمداعى جاعدايدى ەسكەرە وتىرىپ بەكىتىلدى» دەلىنگەن حابارلامادا.

17-19-شىلدەدە بىشكەك قالاسىندا شۋ جانە تالاس وزەندەرىندەگى سۋدى ءبولۋ ماسەلەسىن شەشۋ ءۇشىن قىرعىزستان مەن قازاقستان وكىلدەرى كەزدەسكەن.

قازاقستان تاراپى تالاس وزەنى باسسەينىندەگى كۇردەلى جاعدايدى بايانداپ، جامبىلدىق ديقانداردىڭ سۋ تاپشىلىعى ازابىن تارتىپ وتىرعانىن تىلگە تيەك ەتە كەلە 18-31-شىلدە ارالىعىندا كيروۆ سۋ قويماسىنان بەرىلەتىن سۋدى سەكۋندىنا 45 تەكشە مەترگە دەيىن ارتتىرۋدى سۇراعان.

ۆەدومستۆودان تۇسىندىرگەندەي، قول قويىلعان كەستەگە سايكەس جامبىل وبلىسى سەكۋندىنا 40 تەكشە مەتر سۋ الۋى ءتيىس بولاتىن.

قىرعىز تاراپى شۋ مەن تالاس وبلىستارىندا دا ءدال وسىنداي قيىن جاعداي قالىپتاسقانىن، سۋ تاپشىلىعىنا بايلانىستى شتابتار قۇرىلىپ، تۇتىنۋشىلاردى سۋمەن قامتاماسىز ەتۋ ءۇشىن سۋ اينالىمىنىڭ كەستەسى ازىرلەنگەنىن حاباردار ەتتى جانە قازاقستان تاراپىنا سەكۋندىنا 45 تەكشە مەتردەن سۋ جىبەرەتىن بولسا، 1-تامىزعا قاراي قازاقستاننىڭ ۇلەسى 3,54 ميلليون تەكشە مەتر بولاتىنىن، سەكۋندىنا 10 تەكشە مەتر شىعىن كەزىندە سۋ 4-تامىزعا دەيىن تاۋسىلاتىنىن ەسكەرتكەن.

«بەرىلگەن ەسەپ پەن دالەلدەرگە قاراماستان قازاقستان تاراپى وتىنىشىنەن باس تارتقان جوق. بۇل رەتتە قىرعىز تاراپى ءوز فەرمەرلەرىنىڭ تىرشىلىك نارىنە وتە مۇقتاج ەكەنىن بىلسە دە، امالسىزدان سۋ اينالىمى كەستەسىن ەنگىزۋ ارقىلى سۋ الۋ ءليميتىن ۇنەمدەدى. ايتا كەتۋ كەرەك، بۇگىنگى كۇنگە دەيىن تالاس القابىندا سۋمەن قامتۋ كولەمى وتە تومەن دەڭگەيدە قالىپ وتىر»، - دەپ حابارلادى اۋىل شارۋاشىلىعى مينيسترلىگىنەن.

كەزدەسۋدە تامىز ايىنىڭ ەكىنشى ونكۇندىگىنەن باستاپ قازاقستان تاراپىنا سۋ بەرىلمەيتىنى تۋرالى حاتتاماعا قول قويىلعان.

سونىمەن بىرگە، كيروۆ سۋ قويماسىنا قۇيىلاتىن اعىس ۇلعايعان جاعدايدا قازاقستانعا ارناپ سۋ جينالاتىن بولىپ كەلىسىلدى.

«وكىنىشكە قاراي، بۇگىنگى كۇنى سۋ قويماسىنداعى سۋ شىعىنى - سەكۋندىنا نەبارى 1 تەكشە مەتر، كەلىپ جاتقان سۋدىڭ كوبەيەتىن ءتۇرى جوق. 2022 -جىلى سۋ شىعىنى سەكۋندىنا 13,7 تەكشە مەتر ەدى. ايتا كەتۋ كەرەك، قازاقستاننىڭ «تالاس» ارناسىنان مەملەكەتتىك شەكارا بويىنداعى كوللەكتورلىق- درەناجدىق جەلى ارقىلى سەكۋندىنا 5-تەن 8 تەكشە مەترگە دەيىنگى سۋ قابىلداۋ مۇمكىندىگى بار»، - دەپ تولىقتىردى مينيسترلىك.

بۇعان دەيىن قىرعىزستاننىڭ جامبىل وبلىسىنا سۋارمالى سۋ بەرۋدى توقتاتقانى بەلگىلى بولعان.