كوروناۆيرۋسقا قارسى يممۋندىق ءسۇت شىعارىلدى

تاشكەنت. قازاقپارات - وزبەكستاندا بىرەگەي ءونىم - كوروناۆيرۋستى بەيتاراپتاندىرۋعا قابىلەتتى يممۋندىق ءسۇت شىعارىلدى، دەپ حابارلايدى قازاقپارات كابارعا سىلتەمە جاساپ.

«قاراقالپاقستان استاناسى نوكىس قالاسىندا جۇمىس ىستەيتىن «پانايەۆفارمس» سەرىكتەستىگى SARS- CoV-2 ينفەكسياسىن زالالسىزداندىرۋ قاسيەتىنە يە يممۋندىق ءسۇت پەن ءسۇت ونىمدەرىن ءوندىرۋدى جانە ساتۋدى باستادى»، - دەلىنگەن حابارلامادا.

كوروناۆيرۋسقا قارسى يممۋندىق ءسۇت الۋ جوباسى بويىنشا جۇمىس 2021-جىلى يننوۆاتسيالىق دامۋ مينيسترلىگى جانىنداعى حالىقارالىق مولەكۋلالىق اللەرگولوگيا ورتالىعى مەن ۆەنا مەديتسينالىق ۋنيۆەرسيتەتىندە باستالدى. ەكسپەريمەنت رەتىندە «PanaevFarms» كاسىپورنى اۆستريا مەن گەرمانيادان اكەلىنگەن اسىل تۇقىمدى سيىرلار مەن گولشتەين سيىرلارىنا وزبەك-قىتايلىق ZF- UZ- VAC2001 ۆاكسيناسىنىڭ 3 دوزاسىن العان.

2022-جىلى ZF- UZ- VAC2001 رەكومبينانتتى ۆاكسينامەن ەگىلگەن سيىرلاردىڭ يممۋندىق سۇتىنەن الىنعان تالداۋ ناتيجەلەرى ەكىنشى دوزادان سوڭ ەكى اپتادان كەيىن بەيتاراپتاندىراتىن انتيدەنەلەر دامىعانىن كورسەتتى.

2022-جىلدىڭ قازان ايىنان باستاپ PanayevFarms-تە Immune Milk ساۋدا بەلگىسىمەن پاستەرلەنگەن ءسۇتتى شاعىن كولەمدە وندىرۋگە ارنالعان تەحنولوگيالىق جەلىلەردى سىناۋ باستالدى.

Frontiers in Nutrition بەدەلدى عىلىمي جۋرنالىندا كوروناۆيرۋستىق ينفەكسياعا قارسى يممۋندىق ءسۇتتىڭ جاڭا بۋىنىنىڭ ناتيجەلەرى تۋرالى عىلىمي ماقالا جاريالاندى.

ساراپشىلاردىڭ پىكىرىنشە، بۇل اسىرەسە د د ۇ ەريس وميكرون شتاممىنىڭ جاڭا نۇسقاسىنىڭ الەمدە جىلدام تارالۋى تۋرالى جاريالاعان جاعدايدا ماڭىزدى.