قىزمەت پەن سپورتتى قاتار الىپ جۇرەمىن - الەم چەمپيونى اتانعان قىزىلوردالىق پوليتسەي
دۇنيەجۇزىلىك دودادا ەل نامىسىن ابىرويمەن قورعاعان ول باسەكەدە ءوزىن بابىندا ەكەنىن كورسەتتى. وبلىستىق پوليتسيا دەپارتامەنتىندە قىزمەت اتقاراتىن ارايلىم قاشاندا سپورتپەن اينالىسۋعا تۇراقتى تۇردە ۋاقىت بولەدى. قازاقپارات ءتىلشىسى الەم چەمپيونى اتانعان پوليتسەيمەن سۇحباتتاسقان ەدى.
- الدىمەن ءوزىڭ جايلى ايتا كەتسەڭ. قاي جەردە دۇنيەگە كەلدىڭ؟ سپورتقا قاي جاسىڭدا قادام باستىڭ؟
- مەن 2000-جىلى جالاعاش كەنتىندە دۇنيەگە كەلدىم. ون ەكى جاسىمدا دزيۋدو ۇيىرمەسىنىڭ ەسىگىن اشقان ەدىم. العاشقىدا سپورتتىڭ بۇل ءتۇرى ماعان وڭايعا سوققان جوق. دەسە دە وعان دەگەن قىزىعۋشىلىق وزىنە باۋراي ءتۇستى. ماعان دزيۋدونىڭ الىپپەسىن ۇيرەتكەن باپكەر - ارمان مولداحانوۆ. ول كىسى جوعارى جەتىستىككە جەتۋ ءۇشىن ۇلكەن ەڭبەك قاجەت ەكەنىن ۇعىندىردى. ءاربىر جاتتىعۋ بارىسىندا بۇرىن وزىمە بەيمالىم سپورتتىڭ قىر-سىرىنا قانىقتىم. وسىلايشا دزيۋدوعا باۋىر باسىپ، اسقاق ارمان العا قاراي جەتەلەي ءتۇستى.
- دزيۋدومەن اينالىسۋىڭا اتا-اناڭ قارسى بولعان جوق پا؟
- اكەم باقىت پەن انام گۇلنار مەنىڭ تاڭداۋىما قارسى بولعان جوق. قايتا جەتىستىگىمە قۋانىپ، الداعى سايىستارعا قولداۋ كورسەتىپ وتىرادى. سوندىقتان سايىسقا اتتانار الدىندا ول كىسىلەردىڭ باتاسىن الۋعا تىرىسامىن. بۇل ماعان قانات ءبىتىرىپ، كۇش قوسقانداي بولادى.
مەن 2013-جىلى ءجالاڭتوس ءباھادۇر اتىنداعى سپورت مەكتەپ-ينتەرناتىنا وقۋعا ءتۇستىم. ايماقتاعى تالانتتى بالالاردىڭ باسىن قوسقان وقۋ ورنى تالاي چەمپيوندى تاربيەلەپ شىعاردى. مەكتەپ- ينتەرناتتا بىلىكتى مامانداردان ءتالىم الىپ، شەبەرلىگىن ودان ءارى جەتىلدىرە ءتۇستىم. كوپتەگەن جارىستارعا قاتىسىپ، تولايىم تابىستارىممەن باپكەرلەردى قۋانتتىم. 2017-جىلى سپورت-ينتەرناتتى ءتامامداعاننان كەيىن دە بۇل سالادان الىس كەتە قويعان جوقپىن. بۇگىندە پوليتسيا قىزمەتىندە دە جۇرسەم دە قولى قالت ەتكەن ساتتە سپورتپەن اينالىسامىن.
- پوليتسيا قىزمەتى مەن سپورتتى قاتار الىپ ءجۇرۋ قيىنعا سوقپاي ما؟
- جالپى، ساقشى قىزمەتى قاشاندا قىراعىلىقتى قاجەت ەتەتىنى بەلگىلى عوي. ەندەشە، مەنىڭ سپورتپەن اينالىسۋىما ول ەشبىر كەدەرگىسىن كەلتىرمەيدى دەگەن ويدامىن. الەم چەمپيوناتىنا باراردان بۇرىن باسشىلىق تاراپىنان دەمەۋ كورسەتىلىپ، جارىسقا تىڭعىلىقتى دايىندالۋىما بارلىق مۇمكىندىك جاسالدى. بۇل ءۇشىن ارىپتەستەرىمە ريزاشىلىعىم شەكسىز.
راس، ءدۇبىرلى دوداعا قاتىسار الدىندا كوڭىلدە قوبالجۋ بولعانىن جاسىرا المايمىن. دەسە دە جارىس بارىسىندا جەڭىسكە جەتۋگە بار كۇشىمدى سالدىم. بوزكىلەمدە بەس قارسىلاسىممەن شەبەرلىك بايقاستىم. كەيبىر بەلدەسۋىم قيىنعا سوقتى. جارتىلاي فينالدا رەسەيلىك بالۋانمەن جولىقتىم. ەكەۋىمىز بۇدان بۇرىن دا كەزدەسكەن ەدىك. 2022-جىلى وزبەكستاننىڭ نامانگان قالاسىندا وتكەن الەم چەمپيوناتىندا ول مەنى جەڭىپ كەتكەن ەدى. سول كەتكەن ەسەمدى قايتارۋعا مۇمكىندىك تۋدى. بەلدەسۋ بارىسىندا قارسىلاسىمنىڭ وسال تۇسىن تابۋعا تىرىستىم. ناتيجەسىندە تورەشىلەر مەنىڭ جەڭىسىمە قولداۋ كورسەتتى. ودان 6:2 ەسەبىمەن باسىم ءتۇستىم.
فينالدا جولىققان وزبەك بالۋانىمەن العاش رەت كەزدەستىم. سوندىقتان قاتەلىككە بوي الدىرماي، ساق بولۋعا كوڭىل ءبولدىم. بۇل باسەكە ەكەۋىمىزگە دە وڭايعا سوققان جوق. جەڭىسكە جاقىن بولدىق. دەگەنمەن قارسىلاسىم جيى ءتارتىپ بۇزىپ، تورەشىلەر تاراپىنان ەسكەرتۋ الدى. ناتيجەسىندە ساتتىلىك سەرىك بولىپ، جەڭىس تۇعىرىنان كورىندىم.
مەن بەلبەۋ كۇرەسىنەن وزگە دزيۋدو جانە سامبومەن تۇراقتى اينالىسامىن. بالا جاسىنان جانىنا سەرىك ەتكەن سپورت تۇرلەرىن ءاردايىم جانىم قالاپ تۇرادى.
- سىر وڭىرىندە دزيۋدو سپورتىنىڭ دامۋىن قالاي باعالايسىڭ؟
- وڭىردە دزيۋدو كەڭىنەن دامىعان. وعان جەرگىلىكتى بالۋانداردىڭ جەتىستىكتەرى ناقتى دالەل بولا الادى. قازىر ەل قۇراماسىندا سىنعا ءتۇسىپ جۇرگەن ماعجان ءشامشاددين، ابىلايحان جۇبانازار دەگەن قىزىلوردالىق جاستار بار. جەرلەستەرىمىز ءتۇرلى سايىستاردا قازاقستان نامىسىن ابىرويمەن قورعاپ كەلەدى. ولاردىڭ الداعى پاريج وليمپياداسىنا قاتىسۋىنا مۇمكىندىگى زور.
جالپى، ەل قۇراامسىنا قابىلدانۋ ەكىنىڭ بىرىنە بۇيىرا بەرمەيدى. وعان كوپ ەڭبەكتەنىپ، قاجىر-قايراتىڭدى جۇمساۋىڭ ءتيىس. ماعجان جانە ابىلايحان سەكىلدى ۇزدىكتەرىمىز جاس ورەندەرگە ۇلگى بولا الادى. جاتتىعۋ زالىنا جاڭا كەلگەن بالالار سولارعا قاراپ وسەدى. اعالارى سەكىلدى جوعارى بيىكتەردى باعىندىرعاندى قالايدى. بۇل جەرگىلىكتى باپكەرلەردىڭ ولشەۋسىز ەڭبەگىنىڭ جەمىسى دەپ بىلەمىن.
سونداي-اق، قىزىلوردالىق باپكەرلەر ايەلدەر اراسىنداعى دزيۋدودا دا تالاي جۇلدىزعا جول اشتى. ولاردىڭ قاتارىندا جامال بوزوۆا، جانار جانزۇنوۆا، نۇرگۇل تاعايەۆا سەكىلدى سپورتشىلار بار. كەزىندە تالاي باسەكەنىڭ كورىگىن قىزدىرعان ساڭلاقتار قازىر وزدەرى شاكىرت تاربيەلەپ، جەرگىلىكتى سپورتتىڭ دامۋىنا زور ۇلەسىن قوسىپ كەلەدى.
- ال قازاقستاندا اتالعان سپورتتىڭ دامۋى قانداي دەڭگەيدە؟
- ايتا كەتسەك، دزيۋدو سپورتى العاش رەت جاپونيادا پايدا بولعان. بۇل ەلدىڭ وكىلدەرى ءالى كۇنگە دەيىن كوپتەگەن باسەكەدە العاشقى ورىنداردان كورىنىپ كەلەدى. ولارعا لايىقتى توتەپ بەرىپ، تاجىريبەلى بالۋانداردى تاربيەلەپ شىعارعان ەلدەردىڭ قاتارىندا قازاقستان دا بار. ەلىمىزدىڭ بارلىق وڭىرىندە بۇل باعىتتا ارنايى ۇيىرمەلەر جۇمىس ىستەيدى. سول باعىتتا قانشاما بىلىكتى ماماندار جەىمىستى ەڭبەك ەتىپ كەلەدى. ارينە، جاس ورەندەردىڭ بارلىعى چەمپيون تۇعىرىنان كورىنە المايدى. دەگەنمەن ءوزىنىڭ ءومىر جولىنا دۇرىس باعىت الا بىلەدى دەگەن ويدامىن. مەن سولاردىڭ ءبىرىمىن. پوليتسيا قىزمەتىنە كەلۋىمە سپورتتىڭ ۇلكەن كومەگى ءتيدى.
- اڭگىمەڭە راقمەت.
اۆتور: ءادىلجان ۇمبەت