ەلوردادا مەكتەپ جارمەڭكەسى ءوتىپ جاتىر

استانا. قازاقپارات - ەلوردانىڭ بەس نۇكتەسىندە مەكتەپ جارمەڭكەسى ءوتىپ جاتىر، دەپ حابارلايدى قازاقپارات ءتىلشىسى.

ولار نۇرا اۋدانىندا سيرك جانىنداعى اۆتوتۇراقتا، بايقوڭىر اۋدانىندا «ايماقتاۋ» ساۋدا ورتالىعىنىڭ اۆتوتۇراعىندا، سارىارقا اۋدانىندا Demalys Promenade اللەياسىندا، ەسىل اۋدانىندا بوتانيكالىق پارك اۆتوتۇراعىندا جانە الماتى اۋدانىندا ابىلاي حان كوشەسى 20A مەكەنجايىندا ورنالاسقان.

جولداسىمەن ءۇش بالا تاربيەلەپ وتىرعان ەلوردالىق جانار ادەتتەگىدەي بيىل دا باعانىڭ كوتەرىلگەنىن ايتادى.

«جىلدا 1- قىركۇيەككە قاراي ءبارى قىمباتتايدى. ورتاشا ەسەپپەن العاندا ءبىر بالانىڭ وزىنە كيىم الۋعا 50-60 مىڭ تەڭگە جۇمسايمىن. قازىر عانا 15 مىڭ تەڭگەگە كەڭسە تاۋارلارىن ساتىپ الدىم، ءبىراق، ءبارىن ەمەس. ءۇش بالام بار. وتباسىلىق بيۋدجەتكە سالماق تۇسپەۋ ءۇشىن 2 ايدا ءبولىپ الامىن. وتكەن ايدا ساتىپ الا باستادىق، قالعانىن وسى ايدا الامىن»، - دەدى جانار.

ال ساتۋشىلار بيىل داپتەر مەن A4 قاعازىنىڭ باعاسى ارزانداعانىن ايتادى.

«12 پاراقتى كادىمگى داپتەر 20 تەڭگە تۇرادى. 36 پاراقتى قالىڭ داپتەر قۇنى – 160، ال 48 بەتتىگى - 180 تەڭگە. وتكەن جىلمەن سالىستىرعاندا ءبىرشاما ارزان. قالامساپ باعاسى 20 تەڭگەدەن، ءتۇرلى-ءتۇستى قارانداش 500 تەڭگەدەن 2 مىڭ تەڭگەگە دەيىنگى ارالىقتا. وقۋشىلاردىڭ سومكەسى 6 مىڭ تەڭگەدەن باستاپ قىمباتتاي بەرەدى. سۋرەت سالۋعا ارنالعان البوم باعاسى 300 تەڭگەدەن باستالادى. پەنالدى 500 تەڭگە مەن 2 مىڭ تەڭگە ارالىعىندا ساتىپ جاتىرمىز. ساتىپ الۋشى وتىنسە، باعاسىن ازداپ تۇسىرەمىز. باعا قولجەتىمدى. وتكەن جىلى قاعاز، داپتەر باعاسى ءبىرشاما جوعارى بولاتىن. ماسەلەن، A4 قاعازى وتكەن جىلى 4-4,5 مىڭ تەڭگە بولسا، بيىل 2,5 مىڭ تەڭگەدەن ساتىپ جاتىرمىز»، - دەدى مايرا بولات قىزى.

ارينە، ساتۋشىلارداعى مەكتەپ تاۋارلارىنا باعا ءارتۇرلى. دەگەنمەن، مايرا بولات قىزىنىڭ باعا تومەندەگەنى جايلى ايتقانىن تاعى ءبىر ساتۋشى ماقپال دا راستاپ وتىر.

«وتكەن جىلى 12 بەتتىك داپتەردى 40 تەڭگەدەن ساتقان ەدىك. قازىر 25 تەڭگەدەن ساۋدالاپ جاتىرمىز. قالعان تاۋارلاردىڭ باعاسىندا ايىرماشىلىق جوق. اتا-انالار بالالارىنا 15 مىڭ تەڭگەگە كەڭسە زاتتارىن ساتىپ الا الادى. ءتىپتى كەيبىرەۋلەرى 15 مىڭ تەڭگەگە سومكەنى دە، كەڭسە تاۋارلارىن دا ساتىپ الدى»، - دەدى ماقپال.

ۆالەنتينا جارمەڭكەگە نەمەرەلەرىن كيىندىرۋ ءۇشىن كەلىپتى. ول وتكەن جىلى نەمەرەلەرىن جاڭا وقۋ جىلىنا دايىنداۋ ءۇشىن قانشا قاراجات جۇمساعانىن ايتىپ بەردى.

«كەڭسە تاۋارلارى باعاسىن سۇرامادىم. ءبىراق، ريۋكزاك باعاسى قىمباتتاۋ ەكەن. ءبىراق، 8 مىڭ تەڭگەدەن ساتىپ الدىق. قاتەلەسپەسەم، وتكەن جىلى ءۇش بالانى كيىندىرۋ ءۇشىن 500 مىڭ تەڭگە جۇمساعان ەدىك. مەكتەپ فورماسىن، باسقا دا زاتتار ساتىپ الدىق. وتكەن جىلمەن سالىستىرعاندا باعا وسكەنى بايقالادى»، - دەدى ۆالەنتينا.

ەلوردانىڭ تاعى ءبىر تۇرعىنى ءاليا بالالارعا مەكتەپ تاۋارلارىن ارزانعا ساتىپ الۋ جولدارىمەن ءبولىستى.

«اسىرەسە كيىم باعاسى قىمباتتاعان. ءتىپتى شالباردىڭ ءوزى 5 مىڭ تەڭگە تۇرادى. جالپى ءبىر بالاعا شامامەن 70-80 مىڭ تەڭگە جۇمسايمىن. ازىرشە قاراپ ءجۇرمىز، ساتىپ المادىق. كەيدە Wildberries ارقىلى ساتىپ الامىز. ول جەردە ءبىرشاما ارزان»، - دەدى ءاليا.

مەكتەپ فورماسىن ساتۋشى گۇلنار بيىل باعا تومەندەگەنىن ايتادى.

«مەكتەپ فورماسى 15 مىڭ تەڭگە تۇرادى. بۇل سوماعا جيلەتكا، شالبار، كوستيۋم كىرەدى. كويلەك باعاسى 4-5 مىڭ تەڭگە شاماسىندا. بالالارعا ارنالعان ءتۋفليدى 6 مىڭ تەڭگەدەن، كراسسوۆكيدى 6 مىڭ تەڭگەدەن باستاپ الۋعا بولادى. قىزداردىڭ شالبارى 6,5 مىڭ، كويلەگى 5 مىڭ تەڭگە تۇرادى. يۋبكانى 4-5 مىڭ تەڭگەدەن ساتىپ جاتىرمىز. وتكەن جىلى ەرلەرگە ارنالعان كوستيۋمدەر 17 مىڭ تەڭگە بولعان. بيىل باعاسى ءتۇستى. قىمبات ەمەس دەپ ويلايمىن. بيىل 15 مىڭ تەڭگەدەن ساۋدالاۋدامىز»، - دەدى گۇلنار.

ايتا كەتەيىك، مەكتەپ جارمەڭكەسى 1- قىركۇيەككە دەيىن ءار سەنبى جانە جەكسەنبى كۇندەرى جۇمىس ىستەيدى.