يلون ماسك پەن مارك تسۋكەربەرگ اراسىنداعى ايقاس ەجەلگى ريم ستيلىندە وتەدى

استانا. قازاقپارات - ميللياردەرلەر يلون ماسك پەن مارك تسۋكەربەرگ اراسىنداعى جەكپە-جەكتىڭ قايدا وتەتىنى بەلگىلى بولدى، دەپ حابارلايدى قازاقپارات.

بۇل جايىندا X الەۋمەتتىك جەلىسىنىڭ يەسى يلون ماسك ءوز پاراقشاسىندا مالىمەت تاراتتى.

ونىڭ ايتۋىنشا، اتالمىش ايقاستى ءوزىنىڭ جانە تسۋكەربەرگتىڭ قورى ۇيىمداستىرادى.

وسىلايشا ماسك مۇنىڭ الدىنداعى «جەكپە-جەك UFC الاڭىندا وتەدى» دەگەن اقپاراتتى جوققا شىعاردى.

تىكەلەي ەفير X پلاتفورماسىندا (بۇرىنعى Twitter جەلىسىندە- رەد.) جانە تسۋكەربەرگكە تيەسىلى Meta-دا كورسەتىلەدى.

«كامەراعا تۇسەتىن بۇكىل كورىنىس ەجەلگى ريم ستيلىندە بولادى، دەمەك زاماناۋي ەشتەڭە كۇتپەڭدەر. مەن يتاليانىڭ پرەمەر-مينيسترىمەن جانە مادەنيەت مينيسترىمەن سويلەستىم. ولار شارانى ەپيكالىق ورىندا وتكىزۋگە كەلىستى»، - دەپ جازدى يلون ماسك پاراقشاسىندا.

ميللياردەردىڭ سوزىنە قاراعاندا، تۇسكەن قاراجات تۇگەل ارداگەرلەرگە اۋدارىلادى.

ەسكە سالايىق، بۇعان دەيىن يلون ماسك مارك تسۋكەربەرگكە قارسى جەكپە-جەككە قىزۋ دايىندىق جۇرگىزىپ جاتقانىن حابارلاعان ەدى.

قوس ميللياردەردىڭ وكتاگوندا جۇدىرىقتاسۋ يدەياسى 20- ماۋسىمدا تۋعان.

يتاليا ۇكىمەتى ايقاستى ريم كوليزەيىندە ۇيىمداستىرۋ ءۇشىن مارك تسۋكەربەرگپەن بايلانىسقا شىققان.

جەكپە-جەك 26- تامىزدا ءوتۋى مۇمكىن.