قازاقستاندا ينتەرنەت نەگە ناشار: ۇيالى بايلانىس وپەراتورلارىنىڭ جاۋابى

استانا. قازاقپارات - ۇيالى بايلانىس وپەراتورلارى ەلىمىز اۋماعىن ساپالى ينتەرنەتپەن تولىق قامتۋ قاشان مۇمكىن بولاتىنىن ايتتى، دەپ حابارلايدى قازاقپارات ءتىلشىسى.

«ءبىزدىڭ كومپانيادا بايلانىس ناشار اۋماقتاردى قامتۋ باعدارلاماسى كەلەر ەكى جىلدا جۇزەگە اسىرىلادى. بۇل تۇرعىدا 6 ايدىڭ ىشىندە ەلوردا مەن الماتىداعى ۇيالى بايلانىس ماسەلەسىن شەشۋگە ەكپىن قويىلادى. بۇل باعدارلاما بيىلعى جىل باسىنان ىسكە اسىرىلىپ جاتىر. سوندىقتان ساپانىڭ جاقسارعانى جاقىن ارادا بايقالادى»، - دەدى «موبايل تەلەكوم-سەرۆيس (Tele2/Altel)» باس ديرەكتورى سەرگەي كونكوۆ.

وسى ورايدا ول استانا قالاسىنىڭ اۋماعى قارقىنمەن كەڭەيىپ جاتقانىن جانە جاڭادان سالىنعان بۇل اۋدانداردىڭ تۇرعىندارى كوبىرەك شاعىمداناتىنىن ايتتى.

«قازىر بازالىق ستانتسيالاردىڭ قۇرىلىسىن بەلسەندى تۇردە جۇرگىزىپ جاتىرمىز. ءبىزدىڭ كومپانيانىڭ الداعى 6-9 ايداعى جۇمىسى جايىندا ايتاتىن بولسام، تۇرعىندار ساپانىڭ جاقسارعانىن بايقايدى»، - دەدى «موبايل تەلەكوم-سەرۆيس (Tele2/Altel)» باسشىسى.

ءوز كەزەگىندە «Beeline قازاقستان» باس اتقارۋشى ديرەكتورى ەۆگەني ناسترادين ەل اۋماعىندا ۇيالى بايلانىستى پايدالاناتىندار كوبەيگەن سايىن، سالاداعى جابدىقتاردى كۇشەيتۋ تالابى ۇنەمى جوعارىلاي بەرەتىنىن ايتتى.

«ءبىر عيماراتتا ۇيالى بايلانىس ينتەرنەتىنە قوسىلعاندار نەعۇرلىم كوپ بولسا، سوعۇرلىم كوبىرەك جابدىق پەن انتەننالاردى ارنايى ورناتۋ قاجەت بولادى. سوندىقتان ينتەرنەتتى پايدالاناتىندار كوبەيگەن سايىن، جىل سايىن جاڭا قوندىرعىلار ورناتۋعا ءماجبۇرمىز. جالپى، بۇل جاعداي تەحنولوگيانىڭ وزىندىك سيپاتىنا قاراي بارشا الەمدە بايقالىپ وتىر. الەمنىڭ كەز كەلگەن قالاسىندا ينتەرنەتى ناشار اۋدانداردى كەزدەستىرۋگە بولادى»، - دەدى ە. ناسترادين.

بۇدان بۇرىن «Beeline قازاقستاننىڭ» باس اتقارۋشى ديرەكتورى ەلىمىزدە نە سەبەپتى ۇيالى بايلانىس قىزمەتى قىمباتتاپ جاتقانىن تۇسىندىرۋگە تىرىسقان ەدى.

ونىڭ ايتۋىنشا، كەيىنگى 5 جىلدا ەلىمىزدە ءار ابونەنت ينتەرنەتتى 4 ەسە كوبىرەك پايدالانا باستاعان.