ءمينيستر «قازاقتەلەكوم» قۇرامىنان ءبىر ۇيالى بايلانىس وپەراتورى شىعارىلاتىنىن ءمالىم ەتتى

استانا. قازاقپارات - سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنىڭ تەلەكوممۋنيكاتسيا كوميتەتىنىڭ ءتوراعاسى ەرجان مەيراموۆ «قازاقتەلەكوم» قۇرامىنداعى قاي ۇيالى بايلانىس وپەراتورى شىعۋى مۇمكىن ەكەنىن ايتتى، دەپ حابارلايدى قازاقپارات ءتىلشىسى.

«قازىر «قازاقتەلەكوم» كومپانياسىنىڭ قۇرامىندا ەكى ۇيالى (kcell/اctiv جانە «موبايل تەلەكوم- سەرۆيس (Tele2/Altel)» ) بايلانىس وپەراتورى بار. «قازاقتەلەكوم» قۇرامىنداعى ەكى ۇيالى بايلانىس وپەراتورىنىڭ بىرەۋىن شىعارۋ ەسكەرىلگەن. مەنىڭ بىلۋىمشە، Kcell ءدى شىعارۋ بويىنشا ينۆەستورلارمەن كەلىسسوز جاسالىپ جاتىر»، - دەدى ەرجان مەيراموۆ ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.

بۇل تۇرعىدا ول ناقتى قاي ينۆەستور كەلەتىنىن جاريالاي المايتىنىن جەتكىزدى.

ايتا كەتەيىك، بىلتىر سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين «قازاقتەلەكوم» قۇرامىنان ءبىر ۇيالى بايلانىس وپەراتورى شىعارىلاتىنىن ءمالىم ەتتى.

بۇدان بۇرىن حابارلانعانداي، ەلىمىزدە جاڭا ۇيالى بايلانىس وپەراتورى پايدا بولۋى مۇمكىن.

بيىلدىڭ اياعىنا دەيىن 5G جيىلىگىن ساتۋعا ارنالعان اۋكسيون وتكىزۋ جوسپارلان. ەگەر وسى اۋكسيوندا باسقا ينۆەستور جەڭىمپاز اتانسا، وندا جاڭا وپەراتوردىڭ پايدا بولۋى مۇمكىندىگى بار.