استانالىق ايەل بالالارىمەن بىرگە تەرەزەدەن سەكىرمەك بولعان

استانا. قازاقپارات - ايەل بالالارىمەن بىرگە كوپقاباتتى ءۇيدىڭ تەرەزەسىنەن سەكىرىپ كەتپەك بولعان.

ەلوردالىق ءتارتىپ ساقشىلارى قايعىلى وقيعانىڭ الدىن الدى، دەپ حابارلايدى قازاقپارات Polisia.kz-كە سىلتەمە جاساپ.

9-شى قاباتتاعى پاتەردىڭ تەرەزەسىنەن ەكى بالاسىمەن ايەلدىڭ سەكىرەيىن دەپ جاتقانىن ەستىگەن اۆتوپاترۋل وقيعا ورنىنا اتتاندى. ءبىرىنشى بولىپ №26-ۋچاسكەلىك پوليتسيا پۋنكتىنىڭ پوليتسيا بولىمشەسىنىڭ اعا ينسپەكتورى اسقار پاپىشەۆ ءوزىنىڭ سەرىكتەسى ەلدوس نۇعمانوۆپەن بىرگە جەتتى.

ولار اۋدان تۇرعىندارىمەن جيىن وتكىزىپ جاتقان بولاتىن. 9-قاباتقا كوتەرىلگەن پوليتسەيلەر ۇلكەن بالانىڭ اكەسىمەن بىرگە تۇرعانىن كوردى. ال كىشى بالاسىن ايەل ءوزى ۇستاپ تۇرىپ، وعان بىرەۋ جاقىنداسا، سەكىرەتىنىن ايتىپ ايقايلاعان. ءتارتىپ ساقشىلارىنىڭ ءبىرى ايەلدى سوزگە تارتىپ، مۇنداي قادامعا بارماۋىن ءوتىنىپ جاتقاندا، ەكىنشى پوليتسەي فورماسىن ازاماتتىق كيىمگە اۋىستىرىپ، سوسىن پاتەرگە كىرىپ، بايقاماي جاقىنداپ، ءبىر قولىمەن بالانىڭ قولىنان، ەكىنشى قولىمەن اناسىن مىقتاپ ۇستاپ الىپ، بولمەگە قاراي تارتىپ كىرگىزدى.

24 جاستاعى ايەلدىڭ وتباسىلىق جانجالدان كەيىن وسىنداي ارەكەتكە بەل بۋعانى بەلگىلى بولدى. ونىڭ كۇيەۋىنە قاتىستى اكىمشىلىك قۇقىق بۇزۋشىلىق تۋرالى كودەكستىڭ 73-بابىنىڭ 1-بولىگى «وتباسىلىق-تۇرمىستىق قاتىناستار سالاسىنداعى قۇقىققا قايشى ارەكەتتەر» بويىنشا اكىمشىلىك حاتتاما تولتىرىلدى.

وتباسى ەرەكشە باقىلاۋعا الىندى. ايەل بالالارىمەن بىرگە استانا قالاسىنىڭ داعدارىس ورتالىعىنا ورنالاستىرىلدى. ونىمەن پروفيلاكتيكالىق اڭگىمە جۇرگىزىلىپ، پسيحولوگيالىق كومەك كورسەتىلدى.