قازاقپارات تىلشىلەرى «اباي كۇنىنە» ارنالعان ادەبي چەللەندجدى قولدادى

استانا. قازاقپارات - «قازاقپارات» حالىقارالىق اقپارات اگەنتتىگى وتانداسىمىز، ءانشى ديماش قۇدايبەرگەننىڭ اباي كۇنىنە وراي باستاعان ادەبي چەللەندجىن قولدادى، دەپ حابارلايدى قازاقپارات ءتىلشىسى.

ۇلى قازاق ويشىلىنىڭ ەسىمى بۇكىل الەمدە قۇرمەتكە يە. ءبىر كۇن بۇرىن تانىمال ءانشى ديماش قۇدايبەرگەن اقىننىڭ «عىلىم تاپپاي ماقتانبا» ولەڭىن وقىپ، الەۋمەتتىك جەلىدە چەللەندج باستاعان ەدى.

جەرلەسىمىز قازاقستاندىقتاردى، وقىرماندارىن چەللەندجگە قاتىسۋعا شاقىردى. ول ءۇشىن اباي قۇنانباي ۇلىنىڭ كەز كەلگەن شىعارماسىنان ءۇزىندى وقىپ، ونى ۆيدەوعا ءتۇسىرىپ، الەۋمەتتىك جەلىلەردە #abaychallange حەشتەگىمەن ءبولىسۋ قاجەت.

ادەبي ەستافەتانى Jibek Joly تەلەارناسى الىپ، ودان ءارى قازاقپارات تىلشىلەرىنە جولدادى.

چەللەندجگە «قازاقپارات» ح ا ا قازاق، ورىس، وزبەك جانە قىتاي رەداكسيالارىنىڭ جۋرناليستەرى قاتىسىپ، اباي ولەڭدەرىنەن ۇزىندىلەر وقىدى.

ءوز كەزەگىندە قازاقپارات ەستافەتانى Tengrinews.kz سايتىنداعى ارىپتەستەرگە جالعاستىرۋدى امانات ەتەدى.

ايتا كەتسەك، اتالعان ادەبي چەللەندجدى قازاقستاننىڭ وزبەكستانداعى ەلشىلىگىنىڭ قىزمەتكەرلەرى دە قولداپ، ۇلى اقىن جانە ويشىل اباي قۇنانبايەۆتىڭ ەسكەرتكىشىنە گۇل شوقتارىن قويدى.

ايتا كەتەيىك، بۇگىن ەلىمىزدە «اباي كۇنى» اتالىپ ءوتىلىپ جاتىر. بيىل اقىننىڭ تۋعانىنا 178 جىل تولدى.

بۇگىن مەملەكەت باسشىسى اباي كۇنىنە وراي Twitter پاراقشاسىندا قۇتتىقتاۋ جاريالادى.