ەكۆادوردا پرەزيدەنتتىككە كانديداتتى اتىپ كەتتى

كيتو. قازاقپارات - ەكۆادور پرەزيدەنتتىگىنە ۇمىتكەر، ەلدىڭ ۇلتتىق جينالىس دەپۋتاتى فەرناندو ۆيلياۆيسەنسيو سارسەنبى كۇنى ەل استاناسى كيتودا سايلاۋالدى كەزدەسۋدەن كەيىن مەرت بولدى.

ونىڭ باسىنا ءۇش رەت وق اتىلعان، دەپ حابارلايدى قازاقپارات BBC- گە سىلتەمە جاساپ.

ونىڭ سايلاۋالدى توبىنىڭ مۇشەسى جەرگىلىكتى ب ا ق- قا حابارلاعانداي، ۆيلياۆيسەنسيو ماشيناعا وتىرعان كەزدە ەر ادام وعان جاقىنداپ، باسىنا وق اتقان. ونىڭ قازاسىن قازىرگى پرەزيدەنت گيلەرمو لاسسو الەۋمەتتىك جەلىدە راستادى. كۋاگەرلەر ۆيلياۆيسەنسيوعا ءۇش رەت وق اتقانىن مالىمدەدى، اتقان ادام وقيعا ورنىنان قاشىپ كەتكەن.

ەكۆادوردا ەسىرتكى كارتەلدەرىنىڭ كوبەيۋىنەن تۋىنداعان زورلىق- زومبىلىق قىلمىستارىنىڭ ارتۋى ف. ۆيلياۆيسەنسيونىڭ سايلاۋالدى باعدارلاماسىنىڭ باستى ماسەلەسى بولدى.

وتكەن ايدا پرەزيدەنت گ. لاسسو ۇيىمداسقان قىلمىسقا بايلانىستى ءبىرقاتار كىسى ءولىمى بولعاننان كەيىن 3 پروۆينتسيادا توتەنشە جاعداي جانە تۇنگى كومەندانتتىق ساعات جاريالادى. قاۋىپسىزدىكتەن باسقا، ف. ۆيلياۆيسەنسيونىڭ سايلاۋالدى باعدارلاماسى سىبايلاس جەمقورلىقپەن كۇرەسۋگە جانە قورشاعان ورتانىڭ بۇزىلۋىن ازايتۋعا باعىتتالعان. وتكەن اپتادا وعان جانە ونىڭ كومانداسىنا ەسىرتكى ساتۋمەن بايلانىستى باندانىڭ جەتەكشىسى قوقان- لوققى جاساعانى ايتىلعان بولاتىن.

پوليتسيا ەكۆادور پرەزيدەنتتىگىنە ۇىمتكەر فەرناندو ۆيلياۆيسەنسيونى ءولتىردى دەگەن كۇدىكپەن ەكى ادامدى ۇستادى. بۇل تۋرالى سارسەنبىدە Ecuavisa حابارلادى. ءمالىم ەتىلگەندەي، ساياساتكەرگە ءۇش ادام وق اتقان. پوليتسيا ءۇشىنشىسىن ىزدەپ جاتىر.

ەلدە پرەزيدەنت سايلاۋىنىڭ ءبىرىنشى تۋرى 20 -تامىزعا جوسپارلانعان.