الماتى وبلىسىندا نايزاعاي سوققان بالا امان قالدى
«31- شىلدە كۇنى جەدەل جاردەم كولىگىمەن 11 جاستاعى نايزاعاي سوققىسىنان جاراقات العان بالا ءتۇستى. اۋرۋحاناعا تۇسكەن كەزدە پاتسيەنتتىڭ جاعدايى ورتاشا اۋىر بولدى. ونىڭ ارقاسىن، بەلىن جانە سول جاق اياعىنىڭ تومەنگى جاعىن تەرميالىق كۇيىك شالعان. بالاعا شۇعىل كومەك كورسەتىلدى. قازىر بالا تراۆماتولوگيا بولىمىندە حاتتاما بويىنشا ەم قابىلداپ جاتىر»، - دەدى اۋرۋحانا ديرەكتورىنىڭ ورىنباسارى قاليەۆ اسقار ساۋلەبەك ۇلى.
دارىگەرلەر شىلدە-تامىز ايلارىندا نايزاعاي جەرگە جيى سوعاتىنىن ەسكەرتىپ، اتا-انالاردى بالالارىنا ساق بولۋعا شاقىرادى. اتالعان اۋرۋحانا دارىگەرلەرى قايعىلى جاعدايدىڭ الدىن الۋ ماقساتىندا اتا-انالارعا ارناپ ارنايى جادىناما ۇسىنادى.
• جالعىز وسكەن اعاشتىڭ استىنا تىعىلماڭىز. ونداي اعاشتار نايزاعاي تارتۋى مۇمكىن. اسىرەسە، تەرەكتەر، شىرشالار مەن قاراعايلار قاۋىپتى. ويپاتتى جەرلەردە (شۇڭقىرلار، ارىقتار، سايلار) نەمەسە اۆتوموبيل جولدارىنىڭ استىنداعى سۋ وتكىزگىشتەردە جاسىرىنعان دۇرىس.
• قالتاڭىزدان مەتال زاتتاردى (كىلتتەر، شىنجىر، ويىنشىقتار) الىڭىز.
• ەگەر ءسىز ۆەلوسيپەدپەن جۇرسەڭىز، ودان كەم دەگەندە 30 مەتر الىستاپ، جاڭبىر اياقتالعانعا دەيىن جانىنا جاقىنداماڭىز.
• ۇيالى تەلەفوندى ءبىراز ۋاقىتقا ءوشىرىڭىز.
• ەگەر سۋعا ءتۇسۋ كەزىندە نايزاعاي سوعا باستاسا، شۇعىل تۇردە سۋدان شىعىپ، جاعادان 100 مەتر قاشىقتىقتا ءجۇرىڭىز. سۋ ەلەكتر توگىن جاقسى وتكىزەدى جانە نايزاعاي تارتادى.
• مۇمكىندىگىنشە كولىكتە نەمەسە عيماراتتا جاسىرىنىڭىز. ەگەر بۇل مۇمكىن بولماسا، جوعارىداعى ۇسىنىستاردى ورىنداڭىز
• جاياۋ ءجۇرۋدى توقتاتىپ، جاقىن ماڭداعى عيماراتتا كۇتكەن دۇرىس. ايالدامادا كۇتۋ قاۋىپتى. ويتكەنى جەل ايالداما شاتىرىن ۇشىرىپ اكەتۋى مۇمكىن.
• ۇيدە بولساڭىز، بارلىق ەلەكتر قۇرىلعىسىن ءوشىرىپ، تەرەزەلەردى جابىڭىز.
• بالكونعا نەمەسە اۋلاعا شىقپاڭىز. بۇرشاق جاۋا باستاسا، تەرەزەدەن الىس جەردە بولعان دۇرىس. ويتكەنى بۇرشاق تەرەزەنى سىندىرۋى مۇمكىن.