اباي شىعارمالارى حيندي تىلىندە «شابد مانجۋشا» اتاۋىمەن جارىق كوردى

استانا. قازاقپارات - اباي شىعارمالارى حيندي تىلىندە «شابد مانجۋشا» اتاۋىمەن جارىق كوردى. بۇل تۋرالى قازاقستانداعى ءۇندىستان ەلشىلىگىنەن ءمالىم ەتتى، دەپ حابارلايدى قازاقپارات ءتىلشىسى.

«10-تامىز - قازاق اقىنى، فيلوسوفى، مۋزىكانتى، قوعام قايراتكەرى، قازاق جازبا ادەبيەتىنىڭ نەگىزىن قالاۋشى اباي قۇنانباي ۇلىنىڭ تۋعان كۇنى. اباي شىعارماشىلىعى گۋمانيزم مەن اعارتۋشىلىق، مەيىرىمدىلىك پەن ادىلدىك، حالىققا قىزمەت ەتۋ جانە ۇلتتىڭ جەكە تۇلعادان باسىم بولۋى يدەيالارىنا تولى»، - دەپ جازدى ەلشىلىك Instagram جەلىسىندە.

سونىمەن بىرگە ەلشىلىك اباي ءۇندىستاننىڭ ادەبيەت سالاسىندا دا تانىمال ەكەنىن جەتكىزدى.

«2- ماۋسىمدا نيۋ- دەليدە قازاقستان مەن ءۇندىستان اراسىنداعى ديپلوماتيالىق قاتىناستاردىڭ 30 جىل تولۋىنا وراي اباي قۇنانباي ۇلى ءمۇسىنى اشىلدى. ءۇندىستاننىڭ استاناسى دەليدەگى ەڭ ۇلكەن كوشەلەردىڭ ءبىرى ابايدىڭ ەسىمىمەن اتالادى. ءۇندىستاننىڭ مادەني بايلانىستار كەڭەسىنىڭ (ICCR) كومەگىمەن 40 ولەڭ مەن 45 تاربيەلىك سوزدەن تۇراتىن اباي شىعارمالارىنىڭ حيندي جيناعى جارىق كوردى. كىتاپ» سوزدەردىڭ قازىناسى«ماعىناسىن بىلدىرەتىن «شابد مانجۋشا» دەپ اتالادى»، - دەيدى ءۇندىستان ەلشىلىگى.

ايتا كەتەيىك، بۇگىن قازاقستاندا اباي كۇنى اتالىپ وتۋدە. بيىل قازاقتىڭ ۇلى اقىنىنىڭ تۋعانىنا 178 جىل تولدى.

2020 -جىلى ابايدىڭ 175 جىلدىق مەرەيتويىنا وراي 10- تامىز - اباي كۇنى بولىپ بەكىتىلگەن ەدى.