بالاڭىز مەكتەپكە بارۋعا دايىن ەكەنىن قالاي تۇسىنۋگە بولادى؟
اتا-انالار شەشىمدى ادەتتە بالانىڭ تەك زياتكەرلىك دامۋىن ەسكەرە وتىرىپ قابىلدايدى. الايدا بالانىڭ مەكتەپكە دايىن نەمەسە دايىن ەمەس ەكەنىن ءتۇسىنۋ ءۇشىن باسقا دا كورسەتكىشتەرگە ءمان بەرۋ قاجەت.
Massaget.kz بالانىڭ مەكتەپكە دايىن ەكەنىن ءتۇسىنۋ ءۇشىن قانداي كورسەتكىشتەرگە ءمان بەرۋ كەرەگىن ۇسىنادى.
زياتكەرلىك دايىندىق
بۇل كوپشىلىك اتا-انا ءبىرىنشى ءمان بەرەتىن نارسە: ءبىلىم، ەستە ساقتاۋ، زەيىن قويۋ، ويلاۋ، قيالداۋ جانە سويلەۋ دەڭگەيى. عالامتوردا كەڭ تاراعان تەستتەر بالانىڭ وسى تۇسىن باعالايدى. ەگەر بالا بارلىق تاپسىرمانى جاقسى ورىنداسا، اتا-اناسى ونى مەكتەپكە بەرۋگە شەشىم قابىلدايدى. الايدا بالانىڭ مەكتەپكە دايىندىعىنىڭ باسقا تۇستارىن ەلەمەي قويۋعا بولمايدى. سونداي-اق اتا-انالار بالاسىن ەرتە دامىتۋ ماقساتىندا ونى كوپتەگەن ۇيىرمەگە تاسيدى. ارينە، بالانىڭ دامىتۋ جۇمىستارىمەن اينالىسقانى جاقسى، ءبىراق بارلىق نارسەدە شاما بولۋ كەرەك جانە مۇنداي ۇيىرمەلەر بالانىڭ جاسىنا ساي تاڭدالۋى كەرەك. سونىمەن قاتار، بالادا ويناۋعا، قيىلداۋعا بوس ۋاقىت بولۋى كەرەك. ايتپەسە، ءبارىن ءبىلىپ بارعان بالا وقۋدان جىلدام جالىعىپ كەتۋى مۇمكىن.
بالانىڭ زياتكەرلىك دايىندىعىن ۇيدە گرافيكالىق ديكتانت كومەگىمەن انىقتاۋعا بولادى.
پسيحولوگيالىق دايىندىق
زياتكەرلىك دەڭگەيى جوعارى بالالاردىڭ ءوزى ءجيى ءبىرىنشى سىنىپقا بارۋعا پسيحولوگيالىق تۇرعىدا دايىن بولمايدى. ادەتتە، جالپى پسيحولوگيالىق دايىندىق جەتى جاستان كەيىن قالىپتاسادى.
ەگەر بالا قانداي دا ءبىر تاپسىرمانى ورىنداپ، 20 مينۋت ءبىر ورىندا وتىرا الماسا، زەيىنىن ءبىر نارسەگە قويا الماسا، نۇسقامانى ەستە ساقتاماسا، ۇلگى بويىنشا جۇمىس جاساي الماسا، كەز كەلگەن نارسەگە الاڭداسا، ونىڭ وقۋىندا قيىندىقتار تۋىندايدى. مۇنداي جاعدايدا بالاعا ارتىق كۇش تۇسىرمەۋگە تىرىسىڭىز، ۋاقىتشا قوسىمشا ۇيىرمەلەرىن توقتاتا تۇرىڭىز جانە بالانىڭ كوڭىل كۇيىنە ءمان بەرىپ، ونىمەن بىرگە كوبىرەك ۋاقىت وتكىزىڭىز.
فيزيكالىق دايىندىق
ءبىلىم الۋ - تەك اقىل-وي ەمەس، سونداي-اق قيىن فيزيكالىق جۇمىس. بالا اۋىر ريۋكزاك كوتەرىپ جۇرۋگە، ۇيدە جانە مەكتەپتە پارتادا ۇزاق وتىرۋعا ءماجبۇر. اعزانىڭ فۋنكتسيونالدى جۇيەلەرى مۇنداي جۇكتەمە ءۇشىن جەتكىلىكتى تۇردە قالىپتاسقان بولۋى كەرەك.
بالانىڭ فيزيكالىق دايىندىعىن مىنا ادىستەرمەن تەكسەرىپ كورىڭىز:
«فيليپپين تەستى». بالا سول قولىن باسىنىڭ ۇستىمەن وتكىزىپ، الاقانىمەن وڭ جاق قۇلاعىن جابۋى كەرەك. ەگەر الاقان قۇلاقتى تولىقتاي نەمەسە ءبىر بولىگىن جاۋىپ تۇرسا، بالا بويىنىڭ ءوسۋ پروتسەسى باستالعان جانە فيزيكالىق تۇرعىدا ول مەكتەپ جۇكتەمەلەرىنە دايىن. ەگەر الاقانىمەن قۇلاعىن جابا الماسا، بالاعا پارتادا وتىرۋ جانە زەيىن قويۋ قيىن بولۋى مۇمكىن.
تىستەرىنە قاراپ تەكسەرۋ. ازۋ تىستەر سانى بالانىڭ فيزيولوگيالىق جەتىلگەندىگىن كورسەتەدى. ولار قانشالىقتى كوپ بولسا، ونىڭ سۇيەك جۇيەسى ۇزاق جۇكتەمە ءۇشىن جاقسى قالىپتاسقان.
الەۋمەتتىك دايىندىق
بالا ەرەسەكتەرمەن دە، قۇرداستارىمەن دە سويلەسە ءبىلۋى كەرەك جانە قوعامدا بەلگىلەنگەن ەرەجەنى قابىلداي الۋى قاجەت. ەگەر بالا قۇرداستارىمەن بەلسەندى ويناسا، اينالاداعى نارسەلەرگە قىزىقسا جانە كوپ سۇراق قوياتىن بولسا، بۇل ونىڭ الەۋمەتتىك دامۋىن كورسەتەدى. ەگەر بالا ءوتىنىشتى ناشار قابىلداسا، ەرەجەلەردى بۇزۋعا ۇيرەنىپ قالسا، قۇرداستارىمەن ورتاق ءتىل تابا الماسا، ونىڭ مەكتەپكە بەيىمدەلۋى قيىن بولۋى مۇمكىن.
مۇنداي پروبلەما ادەتتە بالاباقشاعا بارماعان بالالاردا كەزدەسەدى. ولار سۇراق قويۋعا ۇيالۋى نەمەسە ەرەسەك ادامنان كومەك سۇراۋعا قىسىلۋى مۇمكىن. سونداي-اق بالالارمەن بىرگە ورتاق نارسە جاساي الماۋى مۇمكىن. ءبىراق بۇل بالانىڭ مەكتەپتە وقي المايتىندىعىن كورسەتپەيدى، بۇل كەزدە اتا-انا مەن مۇعالىم تاراپىنان كوبىرەك جۇمىس ىستەۋ تالاپ ەتىلەدى.
سونىمەن قاتار، بالا قاراپايىم تۇرمىستىق داعدىلاردى ءبىلۋى كەرەك: باۋ بايلاي الۋ، سپورتتىق كيىمىن كيە الۋ، مەكتەپ قۇرالدارىن سومكەسىنە سالۋ، قولىن جۋۋ جانە بىردەڭەنى وزدىگىنەن ىستەي الماسا ەرەسەكتەن كومەك سۇراي ءبىلۋى كەرەك.